Nimin chawhnu dar 2:00 khan Champhai Vengthlang, Rahsi Venga Taxation Office thar tur Pu R.Laihnuna In Rs. 38 Lakhs senga lei chu Pu J.H.Rothuama, Taxation Minister in a hawng.

Hawnna thu sawiin Minister chuan India ram tana chhiah chungchang zirin tunhnaiah Europe ram hrang hrang an fan kual thu sawiin, ram changkangah te chuan chhiah an lo pe nasa em em a. Chu chu ram mipuiin nasa takin a chhawr let a, sorkar chuan naupang education atan leh inenkawlna (medical) lamah te leh tar enkawlna te thleng pawhin chhiah an pek tlingkhawm atang hian a thlawnin a enkawl let thung a ni, a ti. Mizoram hian chhiah pek chungchangah zir tur kan la ngah hle a ni, tiin Minister chuan, kan chhiah pek te a la tlem hle a, North East lam phei chu Income tax min la awl lehnghal a, hei vang hian state in chhiah kan pek hi a la tlem hle a ni. Chhiah kan pek tlem chuan chhiah tlingkhawm a tlem lo thei lova, chuvangin chhiah pek chungchangah Mizote kan thanharh a tul a ni, a ti a, Champhaia Taxation Office, tuna Superintendent in a enkawl mek hi Assistant Commissioner in a la enkawl thuai dawn a ni, a ti bawk.

Hawnna inkhawm ah hian Khual zahawm Pu T.T.Zothansanga MLA pawhin thusawiin tun hma chuan India ram hi khawvel ram dangin min en hnuai thin a, mahse tunhnaiah Japan kan lehpel a, hma kan sawn zel avangin khawvel hian min en chung tawh hle a ni. Hei hi a chhan chu chhiah pek avangin India hi a lo chungnungin hma a sawn chhoh zel vang a ni. State dangte chuan chhiah an pek that avangin sorkarah pawh an inti neitu a, Mizoram pawh hian kan ram hi hmangaih a, chhiah pek that a tul a ni. A neitu tak tak ni tur chuan chhiah kan pek that a pawimawh a ni, a ti.

Hawnna inkhawm hi Pu Lalthansanga, Secretary Taxation Department in a kaihruai a. Pu R.Lalchhuanawma, Superintendent of Taxes Champhai Zone chuan technical report pein, Office thar an neihna kawnga sulsutu Minister Pu.J.H.Rothuama, Pu T.T.Zothansanga, MLA, Pu Lalthangliana Varte, Commissioner of Taxes leh Mizoram sawrkar chungah lawmthu sawiin he ram/In leina a PWD ten file an kal tan tir ni 4.8.2001 atanga pawisa inhlan thleng hian file hian dawhkan(table) za leh panga(105) a kaltlang thu a sawi a ni.

Taxation office hi ni 4.2.2000 (Friday) ah unit office hawn tan a ni a, ni 10.10.2000 ah unit office chu Circle office ah hlankai leh niin kumin 2011 March thla khan Zonal office ah hlankai a lo ni leh ta a. Tunah thawktu awm zat chu Superintendent of Taxes pakhat leh thawktu dang mi 20 an ni. Pu R.Lalchhuanawma, Superintendent of Taxes in report a pek dan chuan Taxation office hian a din tirh atangin Sawrkar tan chhiah a khawn nghal a, kum 2003-2004 ah 37.31 lakhs khawnin, 2010-2011 ah 168.17 lakhs a khawn chhuak a. 2011-2012 ah phei chuan 201.08 lakhs khawn tur a beisei a niin tunah hian dealer 275 an awm mek a ni.

Taxation office hawn thar hi a in neitu Pu R.Laihnuna hnen atangin ni 13.10.2011 zing dar 10:00 khan a ram lei nan Rs. 38 lakhs chu hlan fel a ni a. A building hi mizo chhiara chhawng thum a hnuaiah tuikhuah 24 x 6 ft x 71/2 a zau awmin main building thlanga Assam type building chu lei tel a ni bawk a. A ram zau zawng chu 369.75Sq m/3978.51 Sq ft, 0.28 bighas a zau ani.  

Taxation Office thar hawnnaah hian Champhai District DC Pu Vijay Kumar Bidhuri bakah Head of Department, NGO, Chanchinbu mi leh mi thahnem tak an tel a, Pu Lalthangliana Varte Commissioner of Taxes chuan lawm thu sawina in he hun hi a khar a ni.