Kum 2011 - 2012 atana Planning Commission-in NLUP tihpuitlin nana cheng vaibelchhe 234.00 (Rs. 234.00 crore) a lo remtih tawh chu Mizoram sorkar hnenah pe (Release) turin Planning Commission chuan Union Ministry of Finance chu October 28, 2011 khan a hriattir a, Planning Commission-in Union Finance Ministry hnena a pekna lehkha copy hi vawiinah Mizoram sorkar chuan a dawng.

He NLUP pawisa Rs. 234.00 crore hi sorkar laipuiin NLUP atana a pek kum hnihna a ni a, a kum khatna chu kum 2010 - 2011 khan Rs. 234.82 crore a lo pe tawh bawk a ni.

NLUP pawisa kum 2011 - 2012 atana Rs. 234.00 crore Planning Commission in pek a tiam khan thu mai a la ni a. Kum 2011 - 2012 atana Mizoram budget-ah thun a nih a, passed anih pawh khan thu mai a la ni.

Hetia Planning Commission in Union Finance Ministry a release tura a tih hian thu chu tisa ah a lo chang ta a ni. Hetia Planning Commission-in kum 2011 - 2012 atana NLUP pawisa hman theih tura Mizoram sorkar hnena pe tura a tih hma hian, kum 2010 - 2011 atana pawisa pek tawhte hmandan report Mizoram sorkar in a thehluh chu uluk takin a enfiah hmasa a. Tuna pawisa a release leh ta hian Mizoram sorkar-in NLUP pawisa a hman danah Central sorkar a lungawi hle tih a lantir a ni.