Vawiin hian Serchhip DC Meeting Hall ah Serchhip District Task Force Committee on Covid-19 te chu an Chairman Dr. Lalzirmawia Chhangte, IAS, Serchhip Bawrhsap hovin an thukhawm a, Lock Down kalpui tawh china hmalakna hrang hrang te thlirletin, hmachhawp awm te an sawi hova,  thuneitu sang zawk atanga thu thar a awm hma chu ni 14th April, 2020 a Mizoram Chief Secretary Order tihchhuah angin District chhungah Lockdown a ngai anga kal pui zel an rel.

Dr. Lalzirmawia Chhangte, IAS chuan District Officers zawng zawng te chu engtiklai pawha an station a awm reng turin a chaha, loh theih loh thila an chhuak dawn a nih pawhin phalna la ngei zel turin a ti a ni. Hun dang angin kan hnate kan thawk tluang tawk lo a nih pawhin a tul huna tangkai thei tura mahni hmuna lo awm hi sawrkar hnathawk hna pakhat a ni, a ti a. Mizoram Chief Secretary, Chairman State Executive Committee on DM Act, 2005 ni bawkin  ni 14 April, 2020 ah Lock down chu May ni 3 thlenga pawhsei a nih thu order a tihchhuah angin lockdown hi tha taka chhunzawm tur a ni a, thuneitu sang zawk atanga thuthar dang a awm loh chuan engkim a ngai anga la kalpui zel rih tur a nih thu a tarlang. Dr. Lalzirmawia Chhangte, IAS hian,  mipuite chu boruak pangai laia kan nunphung anga nun tum tlat thei kan la ni rih lo tih hrereng turin a ngen a, ei leh in thuah te, kan nitin khawsak phungah te pawh nidang kan lo phak lo a nih pawhin phun mai lova, ramin hun harsa a tawh lai a ni tih hria a sawrkar thu tha taka zawm tum theuh turin a ngen a ni.

Vawiina meeting ah hian Medical Team te, Security lama hmalakna te, Supply Chain Management Committee atanga te,  DCSO atanga te, Excise & Narcotic atang te, District Jail chungchang te, leh Jt. VC atang leh YMA lam atanga report te ngaihthlak a ni a. Thil duhawm lo engmah a la awm hrih lova hriat a ni.

Ei leh bar supply lamah Serchhip District dinhmun a zia rih hle a, stock position pawh nitin a thara lak reng niin wholesaler te pawh tha taka bungrua la zel tura chah an ni a, an bungraw phurhluhna tur inter state paltlang phalna erawh Home Department lama dil ngai a nih avangin DC Office atangin Home Department ah hian dilna lut apiang rang taka thawn thlak nghal zel a ni. Niminah pawh Home Department hian Serchhip District atanga dilna Truck 14 te tlan phalna a pe a ni. Oil dinhmun pawh a tha thawkhat a, Gas pawh niminah trip 4 lo thlengin vawiinah trip khat a rawn thleng leh dawn a, heng Gas phur truck leh Gas Bottle te hi PHE Department lamin an rawn thawh Chlorine hmangin phuhfai hmasak vek zel an ni. Silchar leh a chhehvela an zu dawr thin sumdawngten thil man an lo tihsan hlawm avangin Serchhipah pawh thil man hi a sang chho deuh tlat mai a,  hemi chungchang ah hian Supply Chain Management Committee leh Legal Metrology ten a theih ang angin, mipuiten an tawrh nasat zel loh nan hma an la reng bawk. Tin, illegal stock (hoarding) a awm ang tih hlauhthawn thilah hmalakna an kalpui reng bawk a, sumdawng tumah a man tova hralh beiseia engmah a ruk a rala lo chhek khawl lo turin an ngen nghal a ni.

Meetingah hian Pu R. Sathiyasundaram, IPS, SP leh member dang te an tel a ni.