4218/2025-2026 
Dated Serchhip, the 29th January, 2025 : Vawiin khan Serchhip DC Meeting Hall-ah Serchhip District TB Forum leh District Task Force Committee on Immunization chu an Chairman, Pu Paul L. Khuma, Serchhip DC hovin an thukhawm.

He thutkhawm ah hian District TB Officer Dr. Lallawmkimi Chhakchhuak chuan nikum (2025)-a Serchhuip District-a TB Mukt Bharat Abhiyan Phase-I kalpui a nih dan tlangpui sawiin, nikum chhung khan TB vei leh vei lo enfiah mi 15,394 awmin heng zinga mi 1113 te chu X-Ray hmanga enfiah zui niin mi 1050 te TrueNaat leh CBNAAT hmanga enfiah an ni a, mi 113 te chu Microscopy hmanga enfiah an ni tih a sawi a.

Hei bakah hian kumin (2026) February atanga TB Mukt Bharat Abhiyan Phase-II kalpui leh tur atana hmalak dan tur ruahman hrang hrangte sawiin, heng zingah hian khaw tina mipui cheng zat atanga za zela 20 te chu TB an vei leh vei loh enfiah tura ruahman a nih thu te, damdawi In-a damlo enkawl te chu TB an vei leh vei loh enfiah vek tura ruahman a nih thu te leh kumin hian TB Free Village a puan theih khaw 23 an awm thu te tarlan a ni.

District Immunization Officer ni bawk Dr. Lallawmkimi Chhakchhuak chuan Human Papillomavirus (HPV) Vaccine chungchang pawh he hunah hian sawifiahin, he Vaccine hi Chhul hmawr Cancer kan tih thin venna tur a nih thu leh a thlawna pe tura hmalakna kalpui a nih dan te a sawi bawk.

Thutkhawm kaihruaitu Serchhip Bawrhsap Pu Paul L. Khuma chuan TB dona kawnga hmalakna ah a hlawhtlinna tha tak tak hmuh tur a awm zel chu lawmawm a tih thu a sawi a, nikum lamah TB Free Village-a puan theih khaw 9 an awm laia kumin ah khaw 23 lai an awm ta chu lawmawm a tih thu pawh sawiin, khaw tam zawk an inpuan theihna tura hmalak a tul thu leh Data dik leh rintlak neih a nih theihna tura hmalak zel a pawimawh thu te a sawi bawk a ni.