4217/2025-2026  
Lunglei, 2026 Pawlkut thla ni 29 : Lunglei District Bawrhsap kaihhruaina hnuaia "Healthy Lunglei District Campaign" kal tlanga Lunglei District-in hriselna kawnga hma a sawn theihna tur leh hriselna kaihhnawiha mipui mamawhte awlsam zawka inpek theihna atana mobile application duan thar, "LushAI Healthy Lunglei" App chu vawiin khan Lunglei High Powered Committee (HPC) Vice Chairman Pu V. Malsawmtluanga chuan Lunglei DC Conference Hall-ah a tlangzarh.

Khuallian Pu V. Malsawmtluanga chuan Lunglei Bawrhsap leh a thawhpuite bakah, Health & Family Welfare Department-a thawktute hma lakna leh LushAITech lamte nena an thawh hona zara "LushAI Healthy Lunglei" App tlangzarh theiha peih fel a ni chu lawmawm a tih thu a sawi a. Lunglei leh a chhehvela chengte'n awlsam zawka hriselna lam thil an ban thei tur chu lawmawm a tih thu leh khualzinte tan pawh kawng tam tak ṭangkai tur a nih thu sawiin, North East-a heti ang App hmasa ber tlangzarh a ni ta chu Lunglei mai ni lo, Mizoram pum tan pawh hmasawnna ropui tak a nih thu a sawi a. Mizoram sawrkar chuan hriselna a ngai pawimawh tih sawiin, MUHCS pawh mi tam takin an ṭangkaipui tawh thu leh mi tam zawkin an hmelhriat a, an chhawr ṭangkai theih nana hma la turin kal khawmte a chah.

Pu V. Malsawmtluanga chuan Lunglei District-in Lunglei Bawrhsap hma lakna Project LEAP kal tlanga vohbikte tana remchanna leh awlsamna tura hma lakna, Accessible India Campaign (Sugamya Bharat Abhiyan) kalpuina kawnga thawh ṭhat avanga "National Award 2025 for Most Outstanding District in Implementation of Accessible India Campaign" lawmman a dawng chu lawmawm a tih thu leh thawktute a lawmpui thu a sawi a. DC Office chu chei ṭhat a hun tawh avangin Lunglei HPC kal tlangin DC Office chei ṭhatna tur cheng nuai 25 pek a nih tur thu a sawi bawk.

Lunglei District Bawrhsap Pi Navneet Mann chuan hun kaihruaiin, inlawmna thu a sawi a. App siam a nih chhan sawiin, inkai chhawn theih loh natna chi hrang hrang laka District mipuite, a bik takin ṭhalaite an lo him theih nan leh hriselna lam thil pawimawhte awlsam zawka mipui ban phaka chhawp chhuahna tur a nih thu a sawi a. Lunglei chhung mai bakah Lunglei pawn lam mite tan pawh LushAI Healthy Lunglei App hi hman theih vek a nih tur thu sawiin, mipui a tam thei ang berin he App hi chhawr ṭangkai se a duh thu a sawi.

Lunglei District Deputy Chief Medical Officer Dr Christina Zonunmawii chuan report pein, Lunglei Bawrhsap hma laknaa Healthy Lunglei District Campaign kalpui a nih aṭangin Lunglei khaw chhung leh khaw pawn hmun hrang hrangah hriselna endikna (health camp) ṭum 40 chuang buatsaih a nih tawh thu leh Civil Hospital Lungleia Health ATM-ah natna hrang hrang endikna a thlawn veka kalpui mek a nih thu a sawi a. Mipuite chu Health ATM hmang ṭangkai thiam turin a sawm bawk.

App siamtu LushAITech team chuan App hman dan tur tlangpui an sawi fiah a. LushAI Healthy Lunglei App hi mipuite'n awlsam zawka sawrkar damdawi in leh damdawi zawrhnate an dawr leh an biak pawh theihna tura ruahman niin, he app hmang hian district chhunga sawrkar damdawi in leh health centre-a doctor-te ṭhut hun tur a en theih dawn bakah, OPD-a inentir turin appointment a lak lawk (book) theih dawn a. ABHA-a inziah luhna te, he app-a inziak lut damdawi dawr (pharmacy)-te aṭanga damdawi chah theihna te awmin, hriselna lama hriat tur pawimawh hrang hrangte pawh awlsam takin a hmuh theih dawn a ni.

He application hi tun lai thiamna thar ber Artificial Intelligence (AI) leh AI Agent hmanga thuam niin, OPD appointment laknaa pui thei tur leh zawhna hrang hrang Mizo ṭawnga chhang thei tur AI chatbot dah tel a ni a. He app-ah hian LushAITech-in AI model thar ber an siam chu hman a nih thu sawi lan a ni bawk.

Healthy Lunglei App hi Android leh iOS platform-a hman theih tura duan niin, doctor appointment lakna bakah, damdawi in hnai ber zawnna te, doctor-te awm hun leh pharmacy-a damdawi awm zat enna te pawh a awm a. Doctor-te'n an ṭhut hun leh medical report-te an dah lut (upload) thei ang a; damlote hnena an appointment hun hriat nawntirna (reminder) pawh app leh mobile phone-ah a thawn ṭhin ang a. Appointment sut (cancel) duh tan a hun hma darkar 24 chhungin sut theih a ni bawk ang.

He platform-ah hian system administrator, data entry operator leh medical report operator-te tana hman tur web-based dashboard awm bawkin, a hun takah thun luh leh tihfel ngai te an khawih zung zung thei dawn a. He application hi Digital Information Security in Healthcare Act (DISHA) dan zuia siam niin, mipui hriselna chungchang leh an chanchin (data) te him taka vawn a nih theih nan national standard mila ruahman a ni.

Healthy Lunglei Campaign hi June ni 12, 2024 khan kalpui ṭan niin, October ni 12, 2024 khan department leh company hrang hrangte nen Corporate Social Responsibility (CSR) hnuaiah thawh hona thuthlung (MoU) ziah a ni tawh a. Health department leh a kaihhnawiha hma latu hrang hrangte nen Lunglei khawpui chhung leh rural development block hrang hrang — Lungsen, Bunghmun leh Tlabungah te hriselna lam inzirtirna leh endikna kalpui ṭhin a ni a. Tun thleng hian health camp 40 chuang buatsaih tawh niin, mi 2,000 chuang chu hriselna lam chungchang, a bik takin natna inkai chhawn theih loh (NCD) chungchang leh hriselna vawn dan zirtir an ni tawh a. Kohhran hrang hrang, zirna in leh sawrkar pisaah te hriselna endikna kalpui reng a ni bawk.

Healthy Lunglei Initiative kal tlanga district chhung hriselna kaihhnawih tihchangtlunna atan hian August ni 18, 2025 khan Civil Hospital Lunglei leh PHC Lungsenah te Mizorama Health ATM hmasa ber bun leh tlangzarh a lo ni tawh bawk.