430/2023-2024

Dated Serchhip, the 12^th May, 2023: Vawiin khan Serchhip District chhunga lirthei chuan man ennawntu Committee chu an Chairman Pu HD Lalpekmawia, Deputy Commissioner hovin an thukhawm a, State Transport Authority in   ruahmanna a siam angin passenger phur sumdawng lirthei chi hrang hrangte chuan man (passenger fare) ennawnin a rate thar tur ruahman chhinna (fare proposal) an duang.

Chairman chuan, lirthei khalha eizawngtute chu mipuite mamawh hnathawktu rawngbawltu pawimawh tak an ni. Chutihrualin a chuan man lamah thahnem kan ngai lutuk ang a, mipuite tan phurrit kan ni ang tih a hlauhawm ve bawk a. Chuvang chuan lirtheia eizawngtute leh min hmangtu mipuite tana chhe lo ve ve tura ruahmanna kan siam thiam a pawimawh hle a ni, a ti a. Taxi thenkhat uchuak deuh taka chuan man chhiar thin an awm nia a hriat thute pawh tarlangin hetianga mipuite chunga fel lo taka thiltih hi awm lo se a duh tak zet tih a sawi a ni.

Pu C. Lalawmpuia, DTO leh Member Secretary ni bawk chuan lirthei chuan man hi State Transport Authority chuan kum hnih dana ennawn thin ni se a tih anga he meeting hi koh a nih thu a sawi a. District tinin ruahman chhinna siamin State Transport Authority lama thehluh leh tur a nih thu a tarlang.

Meetingah hian Serchhip Auto Rickshaw Owner Association chuan an tlan chhuah kilometer hmasa bera Rs 30 an hman lai chu Rs 40 a tihsan an rawt a, a dawtleh kilometer rate awmsa (subsequent kilometers rate) Rs. 20 erawh an la chhe lovah an inngai a ni. Taxi Owner Association te chuan tuna sawrkar rate ding mek kum 2021 a siam aia tlawma an tlan mek thu an sawi thunh. Maxi Cap lam ten rate hmanlai metalled road a Kilometer khat zela Rs 3 leh unmettaled road a Rs 3.50 chu metalled ah Rs 4, unmetalled ah Rs 4.50 ni se tiin an ngen a. Tin, Bus lam ten an rate hman lai Kilometer khata Rs 2 chu Rs 4 ah tihsan ni se tiin rawtna an thlen bawk.

Heng rawtna te hi State Transport Authority ah thehluh a ni dawn a ni. Tin, Taxi leh Auto Rickshaw permit pek belh an remtih leh tih loh sawi hona neihzui a ni a, tun dinhmunah Rickshaw leh Taxi te hi kan indaih rih nia an hriat thu tarlang a ni. District Transport Office chhinchhiah danin tunah hian Serchhip district ah Auto Rickshaw permit 535 leh Taxi permit 184 a awm mek a ni.