Vawiin chawhma dar 11:00 khan Serchhip DC Meeting room ah Serchhip District Vigilance and Monitoring Committee chu an chairman Pu Ronald Sapa Tlau, Member of Parliament, Rajya Sabha hovin an thukhawm a, he hun hi Er. Lalrinawma, MLA, Tuikum Assembly Constituency in a hmanpui a, Serchhip District a Centrally Sponsored Scheme kalpuitu Line Department te an tel tha hle a ni.

Chairman Pu Ronald Sapa Tlau chuan Centrally Sponsored Scheme bakah Sawrkar Laipui scheme dang chi hrang hrangte Serchhip District District chhunga eng ang taka thawh nge a nih a, eng harsatna nge kan tawh a engtia sutkian tur nge tih ngaihtuah ho te, Department performance tha leh thalo te thlir a a che thalo te engtin nge kan intihchak ang tih te chu an tum ber anih thu leh tihsual ringawt inkher  chu an tum a nih loh thu a sawi a, eizawnna leh nunphung tihhmasawnna kawnga theihtawpa hma lak a tum thu District Vigilance and Monitoring Committee hmasa a alo sawi tawh te pawh a bawhzui dan report in “Pa” (mushroom) khawi dan tur chungchangah pawh Taiwan sawrkar thui taka a dawr tawh thu te, ram leh ram inkar thu anih avanga hun a la duhrei dawn thu te sawiin hemi chungchang tho hi Parliament a rajya sabha thutkhawmah a auchhuahpui thu leh Sawrkar Laipuia Science & Technology Department in hmalakpui an in tiam thu leh remchang hmasa bera bul tan an tum thu a sawi langa, MP Model Village atana Sawrkar Laipuiin sum a dah (allocate) lo chu thil fello tak anih thu leh a hranpa a he scheme hnuaia sum dan anih ngei theih nana hma la tura Prime Minister a phut thu a auchhuahpui tih a sawi lang bawk a ni.

Vawiin District Vigilance & Monitoring Committee thukhawm chuan District chhunga Infant Mortality Rate sang lutuk chungchang sawichhuak lehin zirchianna an neih atang a an hmuhchhuah pakhat chu Nu in nau a pai lai leh hnute a pek laiin Thiamine (Vitamin B1) an tlachham ani tih sawilan a ni a, hei hi a chhan ber chu nu in nau a pai laiin kuhva rah, vaihlo leh zu laka an insum tawk loh vanga awm thei anih bakah raipuar bula awm te vaihlo zial laka an insum tawk loh vang te a awm ni a sawi a ni a; hetiang laka insum a pawimawh bakah Thiamine (Vitamin B1) siam tu  damdawi Neurobian, Becosule etc. ei uluk se nasa taka a zia awm beisei anih thu leh hetiang kawnga zirtirna inpek uar lehzual a tul thu tarlan a nih bakah Serchhip District in  Gynaecologist leh Pediatrician nghet an neilo chu an harsatna lian tak pakhat anih thu tarlan niin, Khawlailung PHC a thawk tur Medical Officer (Doctor) dah a nilo pawh harsatna a tam phah tih sawichhuah a ni a, thuneitu liante lam atangin a sutkian dan tur ruahmanna mumal awm thei thuai se an duh takzet thu sawilan a ni bawk.

UD&PA Department kaltlangin Scheme hlawm lian pathum Swarna Jayanti Shahari Rojgar Yojana (SJSRY), Integrated Housing & Slum Development Programme (IHSDP) leh National Urban Livelihood Mission (NULM) thawh anih thu meetingah hian tarlan a ni a, SJSRY hnuaiah hian scheme hrang pali awm leh in STEP-UP scheme hnuaiah kum 2011-2015 thleng Rs. 28,00,000 hmuh tawh anih thu leh beneficiary 365 training pek an ni tawh a, UWSP hnuaiah Rs. 15,90,000/- hmuh tawh niin Self-Help Group 44 din an ni tawh a,  Rs. 11,00,000/- hman ral ani tawh a ni. UWEP hnuaiah Rs. 15,70,000 hmuh tawh niin tha taka hman zawh vek a ni a, USEP hnuaiah Rs. 16,67,000/- hmuh niin beneficiary 32 hnenah loan & subsidy anga pek chhuah vek a ni tawh bawk. IHSDP hnuaiah chenna In 350 sak tura tih niin 346 sak zawh fel ani tawh a, NULM hnuaia fund hmuh te chu tunah hian a hmanna tur ruahman mek anih thu report a ni bawk.

Hei bakah hian UD&PA Department enkawltu officer leh staff dah mumal a la nih loh avangin DLAO in a hmui rih a, thiam bikna nei ten an thawh tur chi a tam bawk nen hna chak taka thawh a harsat thu tarlan a ni bawk.

IAY kaltlangin kum kalta chhung khan chenna In 26 (Serchhip RD Block – 17, East Lungdar RD Block – 9) sak zawh tawh niin tun kum thar atana sanction Sawrkar Laipui atanga hmuh ala nih loh thu tarlan a ni a, IAY beneficiary thlan chungchanga political interference awm leh awmloh chungchang zawhna awm chu Project Director, DRDA Pi Teresy Vanlalhruaii chuan harsatna an tawh ngailoh thu leh political worker te an inrawlh ngai loh thu leh permanent wait list atanga diktaka kalpui thin anih thu in a chhang a, chairman pawhin thil entawntlak leh lawmawm tak anih thu a sawi bawk. IAY beneficiary te tana  DRI loan chungchang Er. Lalrinawma, Tuikum MLA zawhna chu Bank lamin an dawnsawn that loh thin avanga beneficiary ten harsatna an tawh thin thu a chhan niin RBI meuhin instruction Bank te hnena a pek tawh hnu pawh a harsatna la awm fo chungchanga MRB leh MCAB hotute lo sawipui a tum thu Pu Ronald Sapa Tlau chuan a sawi a ni.

PMGSY chungchangah Khawlailung – Hmuntha road PMGSY Scheme a telh ve theih siloh chu siam anih theih dan kawng dap mek anih thu lehconcept paper pawh thehluh anih tawh thu tarlan ani a Chhingchhip-Hmuntha Road, Chhingchhip-Thentlang Road, Chhingchhip-Hualtu Road leh Hmuntha – Khawbel Road te pawh zawhfel tep an nih tawh thu tarlan niin East Lungdar – Sailulak Road pawh contractor harsatna tawh te enpui niin tunah hian thahnemngai taka thawh chhunzawm zel anih thu leh hun tiam chhung erawh zawhfel theih anih dawn tak loh thu tarlan ani a, Lungpho-Hmunzawl Road leh Chhawrtui – Vanchengpui Road chu March, 2016 a zawhfel theih beisei anih thu te, Rullam – Lungpho Road pawh kumin December thla a zawhfel hman beisei anih thu tarlan ani bawk.

Sawrkar Laipui a a fawng chelhtute an inthlak avang leh kalphung thar hman anih avangin Sawrkar laipui atang Centrally-Sponsored Scheme neih mek te kalpui chhunzawmna tur sum hmuh a la nih mumal loh avangin CSS tam zawk hi chu hma lak hleih theih anih rih loh thu Line Department ten an sawi a ni.District Vigilance and Monitoring Committee hi kum khata vawi hnih thutkhawm ani thin a, tunah hian ruahmanna thar kalpui niin thla thum dan (Quarterly) a neih tawh tur a ni a, Lok Sabha MP Pu CL Ruala’n Mizoram chhim lam District a chang a, Rajya Sabha MP Pu Ronald Sapa Tlau hian Mizoram hmar lam District te a chang thung a ni.