Mizoram Youth Commission leh YMA Sub-Hqrs Serchhip tangkawp buatsaih thlakhat awh tur Mobile Vocational Training chu vawiin chhun dar 12:00 khan Serchhip Hmar Veng YMA Hall-ah Pu TT Zothansanga, Parliamentary Secretary chuan a hawng
Training hawn inkhawmah khuallian chuan thusawiin kawng engkima hlawhtling tur chuan invawn theihna (Discipline) a pawimawh ber a ni a ti a, hlawhtling tur chuan midangte aia pen hnih pen thum a pen thui tura inpek a ngai ani tiin vawiina training tur te chu hun lo la awm zel tur atana darthlalang an ni a ti a; Training turte (Trainee) te chu hlawhtling ngei tura bei turin a chah a ni. Hnamdang miistiri ngai lova Mizo Cement Mistiri-a intodelh chu ram hruaitute hmathlir ber pakhat a nih thu sawilangin, Mizoram lo chu ram dang kan neih loh avangin ram hmasawn leh intodelh nana theihtawp chhuah a pawimawh a ni a ti a, Trainee te chu an zir chhuah hnuah anmahni ruaitute thahnemngaih thinlung pu tel thei tur leh taima taka thawk thin turin a chah bawk a, hriatna tlakchham vang ni lova, thawhrim tlakchhamna avanga kan hlawhchham thin thu sawiin Khuallian chuan training tur te chu tumruhna, taimakna leh thawhrimna nena an thil zira hlawhtling ngei turin a chah bawk
Mobile Vocational Training hi YMA Sub Hqrs YMA hnuaia Education & Youth Affairs Sub Committee hmalaknaa Mizoram Youth Commission leh YMA Sub-Hqrs Serchhip tangkawpin a buatsaih a ni a, Trade hrang hrang paruk (6) - Cement Mistiri, Beauty & Hairing, Cutting & Tailoring , Electric Wiring, Mobile Phone repairing leh Two Wheeler repairing te an ni a, Sub Hqrs YMA Serchhip huamchhunga YMA Branch 71 atanga Branch 26 atangin YMA Member 118 ten thla khat chhung (May 19 - June 19) an training dawn a, Cement Mistiri - 11, Beauty & Hairing - 17, Cutting & Tailoring - 24, Electric Wiring - 27, Mobile repairing - 18 leh Two Wheeler repairing - 21 ten training hi an nei dawn a, Training chhung hian Internal Exam a awm reng bawk ang a, Training chhuak te hi Certificate pek vek an ni ang
Training hawn inkhawm hi Pu C. Lalhminghlua, Chairman, Education & Youth Affairs Sub Committee in a kaihruai a, he hunah hian Dr. JT Vanlalngheta, Secretary, Mizoram Youth Commission chuan thu a sawi bawk a, Pu R. Sanghmingthanga, Secretary, Sub Hqrs YMA Serchhip-in inlawmna thu sawiin Pu Lalsawmzuala, Superintendent, Mizoram Youth Commission leh Pu K. Laltlanmawia, Seretary, Education & Youth Affairs Sub-Committee ten report an pe a, Tv. Thangngaizuala, Fin. Secy, OB incharge, Sub-Hqrs YMA Serchhip-in lawmthu sawiin hun a khar a ni.
