4169/2025-2026

Dated Serchhip, the 27th January, 2026: Serchhip District Water & Sanitation Mission (DWSM) meeting chu an Chairman Pu Paul L Khuma, Serchhip DC hovin vawiin khan Serchhip DC Meeting Hall-ah an thukhawm.

Vawiin meeting ah hian Serchhip District chhung khaw hrang hranga tui intur sem dan thlirho a ni a. Khaw tam zawkah tui hnianghnara pek theih an nih tawh laiin khaw thenkhatah harsatna an tawk a. Heng tui harsatna khuaah te hian Department lamin harsatna an tawh dan te tarlan niin, khuarel chhiatna avanga khawl leh mamawh dang chhia te, tui hna kam avanga a hmun sawn ngaite leh khawl hlui tawh thlak ngai awm te vang a nih thu ngaihthlak a ni a. A siam that dan leh tihchangtlun dan tur te sawiho a ni.

Jal Arpan Diwas (Tui hnathawh inhlanchhawnna) chu sawrkar laipui beisei angin thla thar February 15 ral hmaa neih tur a ni a. He programme ah hian PHE Department in tui pekna an siamte chu dan angin a khaw neitu mipuite hnenah an hlan chhawng dawn a. Mizoram District tinah khaw hnih talah programme hi neih tur niin, Serchhip District ah chuan Hriangtlang leh Khawlailungah te neih a ni ang.

Sewage Treatment Plant siam dan tur vawiin meeting ah hian sawiho niin PHE Department te hian Serchhip khawpui chhungah hmun hnih an enchhin tawh thu an sawi a. A hmunhma te Committee chuan an thlir ho a. Khawtlang hruaitute bawhzui turin an kutah dah a ni.

Jal Seva Aankalan (JSM) kalpui mekah Mizoram chu a titha ber pawl an nih thu Sr. EE Pu Isaac Lalchhuanmawia chuan a sawi a. JSM hnuaiah hian Village Council te chu an khuaa tui lakna dinhmun, a thatna leh fel tawk lo lai awmte enfiah a, eGram Swaraj portal ah thun vek tura tih an ni a. Serchhip District (Rural)-ah chuan khaw 23 ten an ti fel tawh a, portal lam fel loh avanga tifel thei lo khua 7 an la awm thu meeting-ah hian sawi lan a ni bawk.

Vawiin meeting ah hian Serchhip DWSM member te leh VC te an tel a ni.