1957/2026-2027

Dated Serchhip, the 27^th August 2026: Serchhip-a leivung paihna hmunpui, By-pass road lei (bridge) bul ami chu environment tan a him lo tih hriat a nih avangin a thlakna tur hmun dang zawn a ni a. Survey Team ten August 11, 2026-a an thlanchhuah hmun 3 te vawiin khan Serchhip District Bawrhsap Pu Paul L. Khuma hovin thlir hona neih a ni.

Serchhip khawchhunga leivung paihna tura Survey Team ten an lo thlan (recommend) tawh   hmun pathumte zinga pahnih,   Khawtetlang thlang By-pass road, New Serchhip North VC area (Kikawn atanga 3.3km) leh, Pu Hrangnawna ram, Chhim veng VC area  By-pass road ami (Sailiam kawn atanga 2.3km) te chu Notify tur atan  pawm a ni a.

Survey Team ten an lo thlan tawh tho, pathum zinga pakhat, Keitum dai ami erawh chu Zawlpui leilet leh huan neitu inzawmkhawm pawl FMC te rawtna angin, Serchhip zawlpui tan a hlauhawm thei nia hriat a nih avangin Spoil Bank atan hian hman ve loh ni se tiin Committee chuan a rel a. Football Field atana siam tumna hmalakna kalmekah, dawh zawlna tura leivung mamawh a nih chuan retaining wall siam zawh a nih hunah, dawh zawl nan leivungte paih chauh ni se tia rel a ni bawk.

Serchhip District Bawrhsap pu Paul L. Khuma chuan Serchhip mipuite tan leh chhuan thar lo awm zel turte tan Spoil Bank mumal tak, hmun eng emaw zatah neih a pawimawh thu sawiin hmun remchang tha zawk hriat a nih chuan thuneitute hnena hriattir zel turin khawtlang hruaitute chu a sawm a ni.

Vawiin thutkhawmah hian sawrkar hotute bakah khawtlang hruaitu YMA leh concerned VC hruaitute, FMC hotute leh kawnglaitu NHIDCL leh Contractor te an tel a ni.