2442/2025-2026

Dated Serchhip, the 28th November, 2025 : Serchhip khawpui (town) chhunga sa, thei leh thlai chi hrang hrang man (rate) chungchang ngaihtuahin vawiin khan Serchhip DC Meeting Hall ah Bawrhsap Pu Paul L Khuma hovin District Level Committee (DLC) on Fixation of Price of Meat, Vegetables and Fruits member te an thukhawm.

Meeting-ah hian thei, thlai leh sa chi hrang hrang man chungchang sawiho a ni a. Thil man sang zel ngaihtuahin vawksa man chu kumin December ni 13 atangin Serchhip khawpui (town) chhungah kg ah ₹450 ni tawh se, tiin meeting chuan a rel a. Hetih lai hian veng thenkhatah vawksa man hi ₹400 atanga ₹450 a tisang an awm tih hriat a ni a. Mimal emaw pawlhoin emaw, sa leh thlai man (rate) an duhzat bithliah hi The Mizoram Market (Regulation and Facilitation) Act, 2022 bawhchhiatna a nih avangin hrem theih an ni tih vawiin meeting ah hian tarlan a ni a. December ni 13 hmalam zawngah chuan Serchhip khawpui chhunga vawksa man hi ₹400 a la hralh ni se, tiin meeting chuan a rel a ni.

District Commerce & Industries Officer (DCIO) Pi Lalchhanhimi chu he Committee ah hian Member Secretary a ni a. Sub Divisional Officer (Sadar), Sub Divisional Police Officer (SDPO), District Agriculture Officer, District AH & Vety Officer, District Horticulture Officer, Legal Metrology aiawh, Serchhip Town Joint VC Chairman, Serchhip District Consumer Union,  Serchhip District Mizoram Merchant Association, Serchhip Market Association (Sa Ser) leh Serchhip Market Chawhmeh Zuar Association te an tel a ni.