Serchhip Rural Development Block kum 50-na (Golden Jubilee) chu nimin khan Serchhip BDO Office Complex ah ruai nen ropui taka lawm a ni a, he hun hi Serchhip District Bawrhsap Pu P.Lalchhuanga chuan khuallian niin a hmanpui a, Aizawl lam atangin Rural Development Department Director, Pi Lianhmingi Pachuau, Deputy Director(Acct) Pu Ramchuana Fanai, Assistant Director Pu Paul L. Khuma leh Department a thawktu thahnem takin an hman pui a, Serchhip BDO (1982-1985) Pu Ralkhuma, MCS (Rtd) pawhin a telpui bawk a ni.

Jubilee pual inkhawma thusawitu District Bawrhsap chuan Jubilee hlim taka lawm anih rual hian mawhphurhna leh tih tur (duty) kan neih te hi rilru ah tih thar reng a tul a ni a ti a, thingtlang miretheite thian (Friends of the Rural Poor) an ni tih in hre reng tur leh, anmahni vang chauh a hnathawk an ni tih hre reng a, mirethei anmahni dawrtute
tha taka dawng sawng thin turin Serchhip R.D Block hnuaia thawktute chu a chah bawk a ni. District Bawrhsap chuan thingtlang hmasawnna kal rual tir pawimawh zia sawiin Village Council te pawh khaw feeling nei lian lutuk thin lo tura chahin a hunah chuan mahni khawbil mai ngaihtuah lova Block pumpui hmasawnna dah pawimawh a tul chang a awm thin a, insiamrem thiam a tul thin a ni a ti bawk. Jubilee pual inkhawm hi Pu Malsawmtluanga, BDO Serchhip-in a kaihruai a, Pi Lianhmingi Pachuau, RD Director-in Jubilee puala Souvenir buatsaih a tlangzarh a, zaithiam tak tak zai ngaihthlak anih bakah, Serchhip BDO Office a thawk tawh thin te leh BDO lo ni tawh te hnen atangin thu ngaihnawm leh bengvar thlak tak tak ngaihthlak anih bakah, BDO Office a thawk mek ten Jubilee pual liau liau a Pu LT Muana Khiangte hlaphuah “Golden Jubilee” chu mawi takin an rem a ni. Serchhip R.D. Block hi August ni 4, 1961 khan  Community Development Block (C.D.Block) hmingin Serchhip-ah bul tan niin, BDO hmasa ber chu Pu J.K.Khenglawt  a ni a,office staff 26 nen bul an tan a, hetih lai hian Block huam chhung hi a zau em em a, he Block atang hian RD Block 5 (panga) – Aibawk RD Block, Thingsulthliah RD Block, Khawzawl RD Block, East Lungdar RD Block leh Khawbung RD Block te a lo piang chhuak tawh bawk a ni. Serchhip RD Block hi Mizorama RD Block 26 zingah piang hmasa ber panga zingah telin, Tlangnuam RD Block (Aizawl), Lunglei, Thingdawl (Kolasib), Lawngtlai te hi RD Block piang hmasa zawk te an ni a, Serchhip RD Block hian tun thlengin BDO 23 an hrawn tawh bawk a ni.

Tun dinhmunah chuan Serchhip RD Block hnuaiah khaw 26, Village Council 30 leh Village Committee enkawl khaw 3 an awm a, BDO Office ah hian Regular Staff 15 awmin MGNREGA Contract basis-a thawk mi 51 an awm mek bawk a, kum 2011 census a a lan danin Serchhip RD Block huam chhungah hian mihring 50626 ( Mipa 26028, Hmeichhia 24598) an awm a ni.