Vawiin hian Serchhip Town Sanitation Task Force Committee chu Pu Chuahnuna, Addl DC hovin Bawrhsap pisaah an thukhawm a. Solid Waste Management Rules, 2016 ataka Serchhip leh Serchhip District chhunga kalpui dan tur an rel.

He Committee hian Solid Waste Management Rules, 2016 hnuaia tihhlawhtlin ngai hrang hrang heng;  In tinin an bawlhhlawhte chi thuma thliar hran saa bawlhhlawh an paih dan tur te, mitinin bawlhhlawh kan lo neih tlem zawk nana hmalakna tur te, Thirchhe zawng,  Lehkha chhe zawng leh hnawm haia eizawng thin te Register dan tur te,  World Environment Day, 2019 denchhena plastic bawlhhlawh chharkhawm runpui hnatlang neih dan tur te, Serchhip bakah Solid Waste Management  model khua atana khaw thlan te leh hunbi neia thuneitu sang zawka hmalak dan report dan tur te an rel a.

Solid Waste management Rules, 2016 hnuaiah hian chhungkaw tinin an bawlhhlawh te hi chi thum, tawih thei, tawihtheilo leh tur pai (hazardous) an then hran vek thin tur a ni a. Bawlhhlawh paihna atan hian Dumping Ground tih bova Solid Waste Management  Centre neih tawh tur a ni bawk. Tunah hian Serchhip khawpui tana hman tur Solid Waste Management hmun tur hi Village Council te nena inrawn khawm chunga zawn mek a ni.

Serchhip khawpuia Thirchhe zawng, Lehkha chhe zawng leh bawlhhlawh haia eizawng apiangte chu in register vek tawh tur a ni a. Registration hi District Urban Development Office, New Serchhip ah tih tur a ni ang.

World Environment Day, 2019 hi ni 7, June ah (ni 5 tak hi Id-Ul-Ftr a nih avangin) a ni denchhen hian Serchhip khawpuia Plastic bawlhhlawh chhar khawm hnatlang runpui neih tur a ni a. He hun hi DC Office tualah a hawnna neih tur a ni ang a, sawrkar office zawng zawng leh zirna in zawng zawng ten anmahni hmunah plastic bawlhhlawh te thenfai hnatlang an nei ang. Khawpui dung vel chu School hrang hranga Eco Club leh Sanitation Club members thlan chhuah ten an nei thung ang.

Solid Waste Management hmalaknaah hian Model Village neih tura tih a ni a, District Capital bakah khaw pathum thlan tur a ni. Hemi atan hian thuneitu sang zawk atanga rawn thlan sa Leng khua bakah an rawn chhawpchhuah sa khua atangin Khawlailung leh Buangpui thlan an ni bawk.

He hmalakna hi chak leh tha taka kalpui a nih theih nana a tam thei ang ber Awareness neih ni se tiin committee chuan a rel a ni.