Nimin (27.6.2019) khan Chief Minister Pu Zoramthanga chuan a bial Aizawl East-I a fanna ah health care scheme Pradhan Mantri Jan Arogya Yojana (PMJAY) chu awmze nei zawk leh tu tan pawh a awlsam taka banphak a nih theih nan hma lak mek a nih thu a sawi. Chief Minister hian Nausel, Sihphir Venghlun leh Sihphir ah te kalin mipui te nen inkawmna hun a hman bakah bialchhunga vantlang in hrang hrang leh hnathawh awm mek te a fang a ni.

Chief Minister chuan ram hmasawnna tur chuan inkalpawhna kawng tha neih a tul zia te, kuthnathawktute tan kawngpui atanga an lo/huan neihna hmun pan theihna tur link road siamin awlsamna leh hlawkna nasa tak a thlen theih dan te a sawiin sawrkarin chumi atan chuan hma a lak mek zel thu a sawi. Kawng bakah ei leh in, chaw ah hnianghnar a, thenawm state te an lo buai thul pawha harsatna tawk ve lo tura intodelh a tul zia a sawi a. Hriselna a pawimawh thu a sawi bawk a. Tunah hian damlo inenkawlna sawrkar hnathawk ten MR (medical reimbursement) an bill theih thin anga sawrkar hnathawklo te pawhin cheng nuai 5 thleng an inenkawlna senso bill theihna tura sawrkar laipui scheme thar PMJAY chu kalpui ni tawh mahse hospital zawng zawngah hman a la nih loh thu sawiin, chu harsatna chu sukiang tura hmalak mek a nih thu a sawi a ni.

Chief Minister hi PWD Chief Engineer Pu Bowman, Horticulture Department Director Pi Elizabeth Saipari, Agriculture Director Pu Rohmingthanga Colney, Pu Joseph H. Lalramsanga, Rural Development Department Joint Director Pi Rita Lalnunmawii, leh officer dangten an tawiawm a ni.