Lai Autonomous District Council (LADC) hnuaia Village Council tharte'n khawtlang hma sawn nana Rural Development Department hnuaia scheme hrang hranga hna thawh dan leh hma lakna chungchang an hriat chian theih nana Lawngtlai RD Block te'n ni thum chhung awh tur training an buatsaih chu nimin khan Lawngtlai BNRGSK Hall-ah tan a ni.

He training-ah hian Lawngtlai Rural Development Block huam chhunga Village Employment Council leh Vigilance & Monitoring Committee te chu a tahtawla koh khawm niin, vawiin hian Lawngtlai khawpui leh a chhehvela khaw 20 ai awhte an tel.

Lawngtlai BDO Pi Carolyn LB Khiangte chuan he hun hi hmanpuiin, hmasawnna atan ruahmanna tha tak siam niin, pawisa tam tham tak tak dah ni mah se, a nih dan tur anga kalpui a nih loh chuan awmzia a nei thui tak tak thei lo tih a sawi a. Khaw tinin hma sawnna kan neih theih nan khawtlang ai awhtute chu an pawimawh tak zet a, sawrkarin an tih tura ruahmanna a siamte tha taka an hlen chhuah chuan hma sawnna pawh a chak phah thei dawn a ni, a ti.

Training-ah hian MGNREGA leh PMAY chungchang bakah DRDA-in thingtlang hma sawn nana hma lakna a neihte mi thiamte'n an sawi fiah a. Village Employment Council leh Vigilance & Monitoring Committee te'n tih ve tur an neih kawng hrang hrangte hrilh hriat an nih bakah, sawi hona hun hman a ni bawk.