Nimin (27.6.2019) khan Transport Minister Pu T.J Lalnuntluanga chuan Vanapa Hall-ah 30th Road Safety Week, 2019 hawngin, khuallian a ni a. Pu K.T. Beicho, IRAS, Commissioner & Secretary chu khual zahawm niin;  thupui atan ‘Lamliana himna hi Nun himna a ni’ tih chu India ram pumpuiah thlan a ni.

Khuallian Pu T.J Lalnuntluanga chuan thu sawiin, Road Safety Week hawnnaa lokal Pine Mount School Zirlai, Tuikual High School Zirlai leh Zirtirtute leh Association hrang hrang aiawh te hnenah lawmthu a sawi a. Pu T.J. Lalnuntluanga chuan a taka dan zawm leh ram neitu kan nihna anga sawrkar dan zawm chu mitin tih tur a ni, a ti a. Thalai, zirlaite leh motor khalhtu te’n Road Safety Week chu a tangkai thei ang bera hmang turin duhsakna a hlan bawk a ni. Minister Pu T.J Lalnuntluanga chuan fimkhur tawk loh vanga chetsualna tuartute dinhmun chu sawi aia nasa in a rapthlak a ni, a ti a. Indian rama motor chetsualna 100 a 70 chu motor khalhtu thiamloh a ni, tiin sawrkar laipui chuan record a nei a, Mizoram sawrkar pawhin mipuite mamawh hriain, motor khalhtu ten nundan, chetzia leh fimkhur an zirna tur Driving Institution changtlung zawk dinna kawngah hma a la mek a ni, tiin a sawi a. Sawrkar record-a a landanin Kum 2014-ah motor che sual 132 awmin, mi 103 in nunna an chan a, Kum 2018 ah erawh chuan motor che sual 53 awmin, mi 45 in nunna an chan a, statistic-ah chuan hmasawn kan ni a, a hlawhtlinna chu mipuiten sawrkar hmalakna an tawiawm that vang a ni, a ti bawk a ni.

Khual zahawm Pu K.T. Beicho chuan motor a chuang chauh nilo, ke a kal te tan pawh himna leh hlimna kan ngai pawimawh tur a ni, a ti bawk a ni.

Kum 2018 chhunga motor chetsual avanga nunna chan mi 53 leh Kum 2019 (January-March) chhunga mi 14 nunna chan te pualin ngawi rengin minute 1 din a ni a.  Road Safety Slide Show neih a ni a, Road Safety Pledge chamna hun hman a ni bawk a ni. He hun hi Pu Zothangzuala Chhangte, Jt.Director (MV), Transport Department chuan lawmthu sawiin hun hi a khar a ni.