No.107/2020-2021

COVID-19 hripui avangin Ni 21 chhung Mizoram leh India ram pumah inkharkhipna, Lock Down kalpui mek a ni a. Hemi chhung hian kuthnathawktu ten an thlai leh thei tharte hralhchhuah an mamawh a; chutihrualin khawpuiah mipuiin thei leh thlai an lei a ngai ve bawk a. Hemi hre reng hian Sawrkarin Vegetable Supply Chain a duang chhuak ta a ni. District tinah DC hova hma la tura tih a ni a. Aizawl District bikah chuan hemi atan hian Horticulture Department chu Nodal Department ah dah niin, Commerce & Industries Department leh MIZOFED te nena thawk ho tura tih a ni. Kuthnatawktu ten an thlaithar rawn kente atangin sum an hmuh nghal zel a ngaih avangin leh tun dinhmunah kuthnathawktuten ei leh bar tur, nitin chakkhai leina an mamawh avangin an thlai thar rawn thawn ang ang hi man pek tlak zel an ngai a. Chuvangin MIZOFED chu an rawn ken ang apiang chu sumfai pe zel tura tih an ni.

Committee in a rel angin ni 28/03/2020 ah thlai hrang hrang trip 21 lo thleng zingah Serchhip atangin Zikhlum, Bawkbawn leh Tomato alo thleng tel a. COVID-19 hripui len hmain Zikhlum hi wholesale ah kg khat chu Rs. 17 a pek thin niin, retail a hralhna zat chu kg khatah Rs. 50 bawr vel a ni. Heti a nih avang hian Committee chuan kuthnathawktute hmakhua ngaiin Kg ah Rs. 25 in a laksak a ni. Tin, 15% a sangin Local Level Task Force (LLTF) ah pek chhuah leh a ni. LLTF te senso ngaihtuahin Kg ah Rs. 40 aia to lova hralh tura tih an ni. Chutiang bawkin Bawkbawn pawh kg khatah Rs. 25 a laksak an ni a, hei hi 15% a sanga pek chhuah an ni. Hei bakah hian thlai dang chi hrang hrang chu kuthnathawktuten an rawn ken angin a man pek tlak vek a ni. A vawikhatnaah hian khawlum avang leh a tharchhuaktute pack/tuam dan in a zir loh avangin thlai a chhe nasa a. Balhla leh Thingfanghma pawh engemaw zat a tawih a ni. Heng a nih avang hian Aizawl a thlai ken tur buaipuitute chu a tuam dan tur pawh hrilh hriat an ni.

1. March 31, 2020 a thlai thleng leh tur rate hi meeting-ah lo sawi lawh tawh a ni a. Zikhlum bikah chuan kg khat Rs. 30 a lak nise, LLTF hnenah Rs. 40 a pekchhuah nise tia rel niin, Bawkbawn chu Rs. 25 a lak a, LLTF hnenah Rs. 35 a pekchhuah tura rel a ni. Hei hian thlai tam tak tawihral tur a phuhru dawn a ni. Ni 31/03/2020 khan thlai trip 20 vel beisei a nih laiin Trip 40 District thum atangin alo lut a. Hetah hian khawlum avangte, unload nghal theih loh avangte, Pack dan mumal loh avangte leh kalkawngah phurhchhiat tam tak a awm avangin thlai tam tak chu a chhe sain a lo thleng a ni. Chutihrualin MIZOFED hian Challan a thlai man zat thlai awm ang zelin a man alo pe vek a ni.

2. Committee in a rel tawh angin Zikhlum rate chungchangah hian Ni 28/03/2020 (Inrinni) khan Zikhlum hi Rs. 25 a lak a ni a,Task Force hnenah 15% a sangin pek chhuah leh niin, Rs. 3 vel hi a buaipuina senso phurhruk nana tih a ni. Tin, Ni 31/03/2020 a lo thleng erawh chu Rs. 30 a laksak niin Task Force te hnenah Rs. 40 a pekchhuah leh a ni a. Heta cheng 10 hi thlaithar dang - Phuihnam, Khanghu, etc. buaipuina senso leh hralh tlak loh chhe nasa lutuk phuhruk na tura tih a ni. Tun dinhmunah hian MIZOFED hian Rs.3,00,000 (Cheng nuai thum) bawr vel a hloh mek a ni.

3. Zikhlum hralhna Rs. 25 per Kg a kuthnatawhtu ten Rs. 20 chauh an chang tih chungchang hi Serchhip Farmers Society lamte thuneihna a nih avangin hemi ah hi chuan Horticulture Department chuan sawi tur a nei lo.

Serchhip District Consumer Association Secretary in 3/4/2020 a thuchhuah a lo siam ve ngawt hi Association President leh midang hriatpui loh thil a ni a. COVlD-19 donaa Mizoram sawrkar hmalakna sawisel hrim hrim duhna hi awm lovin inthurual a tul khawp mai. He Serchhip District Consumer Association ngei hian tihdikna leh thupha chawina vawiin 4/4/2020 hian an chhuah leh tawh nghe nghe a ni. Chu mai bakah thlaithartu intelkhawm, Agriculture and Horticulture Cooperative Society, Serchhip atangin vawiin 4/4/2020 hian Mizoram sawrkar hmalakna chunga lawmthu sawina an chhuah bawk.

Khawvelin hun harsa a tawh laiin ram ropui USA meuh pawhin tih theih a nei lova, Sawrkarin kuthnathawktu ten thlai an hralh theihna tur leh mipuiin thlai eitur an neih theih nan theih tawp a chhuah zel a. A buaipuitu ten tha leh zung sengin tlaivar dawn dawnin an thawk mek zel a ni. He Vegetable Supply Chain chungchang hi thil thar a nih avang leh in puahchahna hman a awm loh avangin a thawktute pawhin duhthu sam lohna tam tak kan nei ang tih a hriat a. Hetiang dinhmun a awm kan nih avangin hemi hnuaia thawktu Department zawng zawng ten mipui hriatthiamna tak meuh a ngen a ni.