Vawiin hian Serchhip DC Conference Hall ah Bawrhsap Dr. Lalrozama, IAS ruahmanna in Serchhip khawpui chhunga sawrkar officer zawng zawng, tlawmngaipawl zawng zawng, khawtlang hruaitu zawng zawng leh chanchinbumite telna Co-ordination Meeting buatsaih a ni a. Serchhip leh Serchhip District chhunga sawrkar hnathawh dan inzawhfiahna te, hmalak dan tur sawihona te leh mamawh hrang hrangte sawiho a ni.

Dr. Lalrozama, IAS chuan, sawrkar hnathawh dan leh tuna kan dinhmun hrang hrangte mipui hruaituten min hriatpuiin harsatna awm thei leh hmabak la awm te mi hriatpui se tha ka ti a, chutih rualin engkim inhriattawn puia thawh hona tha lehzual neih dan pawh kan zawn zel a pawimawh bawk a ni. Chutiang bawkin mipuiten sawrkar hmalakna atana an duh chi hrang hrangte inhrilhhriat fo a pawimawh em em a, chung thilte rilruah dah chungin hetiang meeting hi buatsaih a ni, a ti. Khawtlang hruaitute, tlawmngaipawl hruaitute leh chanchibumite chu tha leh tul nia an hriatte huai taka sawichhuaka, District changkang leh hmasawn tak kan neih theihna tura an rawtna te sawi chhuak turin a ngen a ni.

He hunah hian Sawrkar Department Officer hrang hrangten a indawtin an Department hmalakna te an sawifiah hlawm a, an hnathawh tawh chin leh hmabak la awm te, harsatna awm thei chi zawng zawngte pawh a kim thei ang bera tarlangin, ruahmanna kal mekte leh khawtlang hruaitute nena thawh ho a tulna chi hrang hrangte a indawtin an sawi hlawm a. Chumi hnuah kalkhawmten zawhna an neih te, rawtna an neihte leh tha nia an hriatte an sawiho zel a ni.

He hunah hian Deparment hrang hrang hotute leh Project hrang hrang enkawltu in-charge officer te an kal tha hle a, Serchhip khaw chhunga VC, NGOs leh chanchinbumite pawh an tel kim hle a ni.