Vawiin chawhma dar 11:00 khan DC Meeting room-ah Serchhip Town Rate and Wages Committee chu Serchhip-a pawl thenkhatin mipui mamawh chi hrang hranga rate-te ennawna siam that ngaite siam tha tura rawtna awmte ngaihtuahin an thukhawm. He meeting hi Chairman leh District Bawrhsap ni bawk Pi Juhi Mukherjee IAS, a pa boral avanga a awmloh avangin Addl. DC Pu V.L. Remthanga MCS in a kaihruaia a ni.

He meeting-ah hian Serchhip-a Furniture Workshop neitu pawl ten Thingzai phel man rate thar siam tura an ngenna leh rate thar atana an rawtna te, tun hnaia Thing Mistiri ten nikhat rate cheng zanga atanga cheng zasarih-a an san chu Sub Hqrs. YMA, Serchhip-in tha lo a tih avanga ngaihtuah tura a ngenna te sawi ho a ni a. Hei bakah hian hnamdang mistiri leh helper rate te, bawnghnute man a let thawka lo pung ta te leh sa chi hrang rate te pawh sawi ho nghal a ni.

Committee chuan thingzai phel man rate thar atana Workshop neitute rawtna chu ngaihtuah hoin hnawl a ni a, a rate pangai hman chhunzawm leh tura tih a ni. Tuna thingzai phelna rate dinglai hman chhunzawm tur chu 4” x 3” (Char tin) - ` 15, 4” x 4” (Char char) Rs. 20 leh a tê phel man Rs. 10 a ni. Tin, Thing Mistiri ten, Aizawl rate ang zawma nikhat rate Rs. 700/- a an lo tisang ve mai chu thil dang dangrate-ah nghawng tha lo nei thei a nih avangin leh mipuite tana phur rit tling thei a nih avangin, a sang berah Mistiri senior leh bungraw nei tha pawhin nikhatah Rs.550/- aia sang an inchhiar tur a ni lo tiin a rel a ni. Hei bakah hian, tun July thla atanga bawng vulhtuten bawnghnute no khat cheng 10/- a an hralh thin, a let thawka an san mai chu a dik lo tiin cheng 15/-ah a bituk sak bawk a ni.

He hunah hian kum 2012-a hnam dang Mistiri-te rate an lo siamsak pawh ennawnsak nghal an ni a, Mistiri senior tan nikhatah cheng 400 leh helper tan 250 a tuksak bawk a, heng rate siam aia tova inchhawr hriat an nih chuan thuneitute hnenah report theih reng a ni. He meeting kaihruaitu Pu Rema, Additional DC chuan ILP pekchhuah leh kalpui dan chungchangah, dan dik taka tih loh a awm thin avangin fimkhur a tul thu a sawi a. ILP hi vawi hnih chauh a renew theih a, chumi hnuah chuan an haw phawt ang a, a bul atanga rawn dil leh tur an nih laiin, permanent settlement pek ang maia vawi hnih renew a thih hnuah awlsam taka a thar an siam leh mai thin hian hnam dang a tikumhlun a, hei hian ngawng tha lo tak a nei thei a ni tiin; office lama thawktute pawhin a dan leh dun te hrechianga fimkhur lehzual a tul thu a sawi a, mamawhna leh sum dinhmun a that zawk avang maia hlawh sang zawk pe tura mite chhawr lai laksaka sponsorship thlakthleng (transfer) hi danin a phal loh thu leh hei hian an thawhna hmun dangah hlawh sang zawk an phut chhunzawm thin avangin hnamdangte hlawhfa rate tisangtu a nih thin thu a sawi a, hnamdang hnathawka kan chah luhte hi, a sponsor-tu hna ngei chauh thawk se, hlawhsan hi an phut ngam ngai loh thu a sawi bawk a ni.

He thutkhawmah hian he committee-in rate a lo siam ang hmang lova, hnamdang mistiri ten theka chauha an thawh duh thu a sawi thin chu a that loh thu sawilan a ni a, a ruaituten theka-a an ruai duh a nih chuan an zalenna ni mahse, mipuite him tlan nan, uchuak lutuka hnamdangte rate inchhiar dan ringawta kal lovin theka rate siam ve mai a that dawn leh dawn loh te ngaihtuah a ni a. Sub Hqrs YMA chu hnam dangte rate hmanlai hi eng behchhana siam nge a nih te, a san leh san loh thute leh theka rate siam ve mai a tul pawha a bituk dan tur awm tawk lo zirchiang tura ruat an ni bawk.

He meeting-ah hian tuna sa chi hrang hrang rate, he committee-in a bituk ding lai leh zawm a hlawh leh hlawh loh te pawh sawi zui nghal a ni a, chairman Pu Rema chuan thupek a awm a nih chuan khauh taka kenkawh a nih tur thu leh tuna rate dinglai pawh hi khauh taka kenkawh a nih tur thu a sawi a. Mipuite hnenah sa chi hrang hrang rate chu a darh zau thei ang bera puan chhuah a nih tur thu te, sa zawrhna hmun bazar lun laiah, lian leh langsar taka sa chi hrang hrang rate tarchhuah a nih tur thu te, sawrkar rate siam zawm lo tute laka thununna lek a nih theih nana complaint theihna tur phone number nen tarchhuah a nih tur thu a sawi bawk a ni. Tuna Sa rate hman tur committee-in a bituk chu Bawng thin Rs. 300/kg, Bawng ti Rs. 280/kg, Bawng sa, a ruh nena sahpawlh Rs. 250/kg, Vawk sa Rs. 250/kg, Ar puahsa Rs.200/kg, Ar puah loh Rs. 170/kg leh phai sangha Rs. 200/kg a ni.