Serchhip-a India Republic day (January ni 26) vawi 63-na lawm dan tur ngaihtuahin vawiin chhun khan Serchhip D.C’s Meeting Room-ah District bawrhsap Pu P. Lalchhuanga hovin Serchhip-a Sawrkar Department hrang hrang hotute leh Tlawmngai Pawl hrang hrang hruaitute an thukhawm. Meeting thurelah chuan Kum 2012 Republic Day lawmna inkhawm hi Serchhip Field No. 2 ah January ni 26, 2012 chawhma dar 10:00 ah tan tur a ruahman a ni a, Republic Day parade neih tur niin Armed Contingent 2 (Police leh 14 Assam Rifles) leh Unarmed Contingent 13 tel tura beisei a ni a, an ni bakah hian Ex-Servicemen te pawh tel tura beisei an ni. Parade hi endiktu siam a a tithate hnenah lawmman pek tur a ni ang.

Meeting-ah hian Republic Day lawmna atana thil pawimawh chi hrang hrang – electrict power supply, tui thianghlim in tur, First Aid, Pavilion leh a hmunhma chei dan tur te bakah tul dangte sawiho a ni a, hemi atana mawhphur tur leh hma la tur hian Department hrang hrang vten chanvo an insem a ni. Republic day zingkarah Serchhip khawchhunga hmun hrang hrang Shalom Special School, Zoar Orphanage Home, Catherine Booth Home for the Aged ah te leh JNM Hospital Poor Fund ah te tanpuina pek tum ani bawk.

Republic day lawmna inkhawmah hian item benglut tak tak Par lam, Dog Show, Cultural dance te entir anih bakah 14 Assam Rifles ten State danga hnam lam hmuhnawm tak tak an entir bawk ang.. Republic Day Volleyball Running Trophy final pawh khelh tur a ruahman a ni a, a buaipui turin Serchhip District Volleyball Association te ruat an ni.

Republic Day ah hian chhun dar 12:30 ah D.C Bungalow, Khawtetlangah “D.C’s At Home” neih tur a ruahman a ni. Republic Day lawmna atana inpuahchahna te leh hmalakna te thlirnawn leh turin January ni 23 hian thutkhawm leh a ni ang.