1606/2022-2023
Dated Serchhip, the 15th August, 2022: Vawiin khan ram chhung hmun dangte rualin India Independence Day vawi 76 na Serchhip Sports Complex ah ropui taka lawm a ni a, Pu Lalruatkima, Minister of State, I&PR, RD, LR&S, etc., chu khuallian a ni.
Kum danga an lo tih tawh thin angin zingkarah Independence Day pual thilpek Serchhip khawpui chhunga Home hrang hrangah te, Hospital leh Jail ah te sem a ni a, a lawmna pui ber hi Serchhip Sports Stadium ah chawhma dar 11 ah neihzui a ni.
He hunah hian khuallian Pu Lalruatkima chuan Hnam Puanzar pawtpharhin, Hnam Puanzar chibai buktu Parade Contingent sawmpahnihte chibai a chhanglet a, thusawina hun a hmang bawk. Minister chuan, India ramin hnam dangte awpbehna hnuai ata zalenna a hmuh theih nana theihtawp lo chhuahtu ram hruaitu hmasa Pu Mahatma Gandhi te, Jawahar Lal Nehru te, Netaji Subash Chandra Bose leh zalenna atana mahni nunna hlantute zawng zawng chibai a buk a. An thawhrimna leh inpekna zarah vawiinah chuan India ram chu khawvela Democracy ram lian ber, Economy lian leh ram venhimna kawngah pawh khawvel zahkai kan ni chho ta a ni. Hmasawnna ropui tak tak kan hmu zui a, kan ram Mizoram ngei pawhin hmasawnna a hmu nasa hle, Serchhip district pawhin vawiin thlengin hmasawnna duhawm tak tak a hmu chho zel a ni, tiin Minister hian tunhnaia hmasawnna kan hmuh langsar zual a tarlang zui a ni.
Mizoram Police department chuan an hnena thubuai thehluh 1633 zinga 676 chu hlawhtling takin an chhui zova, silai tawlhruk tum mi 20 manin thubuai 12 an ziaklut a ni. Serchhip district bikah chuan kum kalta chhung khan case 136 register a ni a, an zinga 102 hi chargesheet niin mi 14 an convict tawh a ni. Supreme Court thupek bawhzuii Police Station leh Outpost zawng zawngah CCTV leh Audio Recorder vuah mek a ni. Hriselna lamah sawrkar chuan hma a la nasa hle a, Sub Centre tam tak Health & Wellness Centre ah hlankai tawh niin la hlankai mek zel a ni. Kan hriat theuh angin covid19 hripuiin nasa takin min chim a, kan district ah mi 14343 in kai tawhin chung zinga mi 35 te chuan vanduaithlak takin an nunna an chan a ni. Hripui laka invenna hi nasa taka kalpui niin vaccine pek beihpui thlak reng a ni a, inenkawlna hmanruate pawh kawng hrang hranga dap niin Serchhip District Hospital ah pawh PSA Oxygen Plant chu October, 2021 khan hawn a ni a, sawrkar sum bakah Deputy Commissioner te thahnemngaihna in Corporate Social Responsibility sum thahnem tak kan district ah lakluh a ni, a ti. Heng bakah hian infiamna lama tunhnaia Mizoramin hmasawnna duhawm tak tak a hmuh dante, tui thianghlim hnianghnar kan neih theih nana Jal Jeevan Missions leh kawng danga hmalakna te, thingtlang khaw inkalpawhna kawng PMGSY a laih mek a nih dan te, thingtlang mite hmasawnna atana Rural Development Department hnathawh hrang hrang, MGNREGA hmanga kum kal meka inhlawhna ni 40 pek a nih tawh thute, MzSRLM leh BADP hmanga hmalakna te, PMKSY Version 2.0 hmanga N. Vanlaiphai leh Lungkawlha hmalak tan a nih thute a tarlang a, zirna lama sawrkarin hma a lakna te, Govt. Serchhip College in kumin kum tira NAAC Grade A a hmuh thute leh College Building tihchangtlun zel a nih dante a tarlang a, loneitute tana SEDP leh Central Scheme hrang hranga sawrkarin hma a lak dante, mirethei insakna kalpui mek thute, Agriculture, Horticulture leh department hrang hrang hmanga hmalaknate a tarlang a ni.
Khuallian hian Police hnathawk tha mi panga te hnenah lawmman hlanna a nei a. Lawmman dawngtute chu Fire Meritoriuos Service dawngtu Pu Lalruatliana, Leading Fireman, Serchhip Fire Station leh ruihhlo dona kawnga thawktha ASI, Vanlallawma, Constable Vanlallawma, Constable Vanmalsawma, Constable Vanlalsiamtluanga leh Constable C. Lalroluaha te an ni. Parade tithate hnenah pawh lawmman hlanna a nei nghal a. Lawmman dawngtute chu pakhatna Goodwill English Academy, pahnihna Marian H/S leh pathumna Presbyterian English School te an ni. Khuallianin lawmman a sem zawh hian Phunchawng Cultural Club, Govt. Serchhip College ten hnam lam chi hrang hrang mipuite an entir bawk a ni.
Kan hriat theuh angin sawrkar laipui chuan kumin India zalenna champha phak vawi 75-na lawmna Azadi Ka Amrit Mahotsav a kalpui meka, chumi peng atan chuan kumin Independence Day ah pawh in tinah Hnam Puanzar zar ni se a tih angin Serchhipah Hnam Puanzar hi mipuiten an chenna inah zarin sawrkar pisaah te zar vek a ni a. A lawmna pui ber Serchhip Sports Complex a buatsaih pawh mipuiten an hlut hle a, Independence Day lawmnaa Serchhip mipui an tel that ber tum a la ni hiala hriat a ni.
A lawmna pui ber neih zawh hian Khawtetlanga Bawrhsap Bangalow ah sawm bikte pualin VIP's at Home Tea Party buatsaih a ni.
Khuallian Thusawi -
Attachment
- Loading attachment...
