No.2447/2021-2022 

Aizawl, the 2^nd October, 2021: Tukin zing khan DC Conference Hall, Serchhip ah Azadi Ka Amrit Mahotsav (AKAM) kharna leh Cleanliness Week, 2021 hawnna hun hman a ni a. Pu Kumar Abhishek, IAS, District Bawrhsap chuan khuallian niin he hun hi a hmanpui.

Khuallian chuan, AKAM kharna leh Mizoram Cleanliness Week, 2021 hawnna hun tha tak kan nei thei hi a lawmawm hle a. AKAM hmalakna chi hrang hrang, bawlhhlawh thliarhran inzirtirna te, faina inelna te, waste to Art exhibition te leh a dangte a hlawhtling hlein ka hria. Hmalaknate a hlawhtlin theih nana thawktute zawng zawng chungah lawmthu ka sawi a ni, a ti. Pu Kumar Abhishek chuan, kan chenna khawvel hi naktuka kan fate tan pawha chenna tlak hmun thianghlim leh hrisel ni zel tura kan enkawl a tul a, chu thilah chuan mitinin mawh kan phur a ni, a ti. Kan bawlhhlawh tawih theilo hote hi khuarei ngaihtuah chunga kan umzui a tul  hle a chuvang chuan CSR atangin plastic hlui hersawmna te ngaihtuah niin a tul anga ngaihtuah belh zel pawh kan tum dawn a ni, a ti. Cleanliness Week kan hman chhoh turah tihtur hrang hrang a la awm a, mawhphurhna neitu zawng zawngte, Head of Offices te, khawtlang hruaitute chu thahnemngai taka an hma zawna hnate hlen theuh tum turin a chah bawk.

Pi Lallawmzuali, Manager UD&PA chuan report pe in Azadi Ka Amrit Mahotsav (AKAM) chu India ramin hmasawnna chi hrang hrang a neih kum 75 lawmna ani a, hemi lawmna atan hian Central Ministry chuan Faina lama hmasawn nan tih tur chi hrang hrang a ruahmana, chung ruahmanna hnuaiah chuan Sanitation Worker tha thlan chhuah anih thu te, Bawlhhlawh tih tlem kawnga hmalakna atan Waste to Art Exhibition siam anih thu te, Vengfai ber thlan leh faina lama hmala nasa veng thlan te, Plastic tih tlem kawnga hma la nasa vengte chawimawina lawmman siam anih thute a sawi a. Kumin Cleanliness week thupui atan hian "Faina -Kan in leh a chhehvel atangin" tih anih angin Chhungkaw tinin an in leh a vel tifai tura beisei an nih thu leh SOP zawm chunga vengchhung leh kawng dung tihfai hnatlangpui neih tura ruahman anih thu a sawi bawk. Bawlhhlawh paihna hmun lova paihte chu dan hmanga man theih niin dan bawhchhiate chu Rs. 200 chawi tir tur an nih tur thu a sawi a. Sawrkar pisa, sumdawnna hmun leh sakhaw hmun hrang hrang ah hnatlangpui neih tur a ni dawn bawk a ni. He faina hapta chhung hian Photography leh One minute mobile video competition buatsaih tur niin, Best news/ editorial coverage chanchinbumite tan buatsaih tur a ni dawn bawk a ni.

AKAM hnuaia hmalakna hrang hrangah VC area fai berah Chanmari veng Village council thlan niin, faina kawnga inzirtirna leh hma la tha ber ah Serchhip Hmar veng Village Council thlan an ni a, plastic leh a kaihnawih hmanraw hmang tlem berah Chhiahtlang North VC thlan an ni bawk a, anni hian lawmpuina thuziak bakah pawisa fai Rs.5000 an dawng a. UD&PA hnuaia Sanitation workers hmeichhe hnathawk tha berah Pi K. Kapthuami chu thlan niin mipa Sanitation workers hnathawk tha berah Pu Lalrinngheta thlan a ni bawk a, anni hian Rs.3000 leh chawimawina thuziak an dawng a ni. Nimina neih zawh tak Waste to Art Exhibition lawman sem nghal niin pakhatna R. Lalbiakhluni, pahnihna R. Vanlalfela leh pathumna Lallianchhungi te hnenah khuallian hian lawman a hlan bawk a ni.

He hunah hian Faina thutiam (Swachhta Pledge) chu Chairman Dr. Albert Vanlalliantluanga, DUDO kaihruaina in kalkhawm ten an chhiar rual a, lehkhaah hming an ziah hnan a ni.

He hun hi Dr. Albert Vanlalliantluanga, DUDO chuan a kaihruai a, sawrkar department hotute leh khawtlang hruaitu thenkhat an tel a. Pi C. Laltleipuii, MCS, SDO(S) chuan lawmthu sawiin he hun hi a khar a ni.