No.2448/2021-2022 

Aizawl the 2nd October, 2021 : India Hnam Pa Mahatma Gandhi pian champha phak puala kum tina buatsaih thin October ni 2-9 awh tur Faina Hapta (Cleanliness Week) 2021 chu Lunglei District tan tukin zing khan Convention centre-ah Bawrhsap Pu Kulothungan A, IAS chuan a hawng.

Faina Hapta (Cleanliness Week) 2021 hawnna thusawiah Lunglei DC Pu Kulothungan A chuan faina leh hmasawnna chu thil kal kawp tlat an ni a, hmasawnna nei tur chuan kan khawtlang nunah faina, hriselna leh thianghlimna a pawimawh takzet a ni, a ti. Kan in leh lo, kan chheh vel kan tihfai mai bakah faina lamah kan rilru sukthlek kan siamthat a tul a, mipui rilruah faina kan tuh chuan inhrilh hriat chawp ngai lovin kan fai reng thei dawn a ni tiin khawtlang hruaitu kalkhawmte chu faina kawngah mawhphurhna sang tak an nei tih hre thar turin a chah a. Lunglei DC chuan faina chu Faina Hapta chhung chauh ni lovin, kum tluana kalpui a, nunpui turin kalkhawmte sawmin Mizoram Khawpui Fai Inelna ah pakhatna dinhmun kan hauh mek humhima, fai ber ni chhunzawm zel thei tura hmalak puiah kalkhawmte a sawm a ni.

He hun hi Clean Lunglei Chief Organizer Pu C. Lalhmingmuana chuan kaihruaiin Lunglei DUDO & Member Secretary Lunglei Sanitation Task Force Pi Vanthangpuii chuan report pe in, Pi F Lalruatkimi, IS UD&PA chuan Pledge Taking a kahruai a, Pu Eddie Zonunkima, SDS chuan lawmthu sawina hun a hmang a ni. Rev John Raldosanga, Administrative Secretary, Synod Office, Lunglei chuan hunserh a hmang a ni.

Cleanliness Week 2021 pual hian SBM (U) T Shirt tlangzarhna neih nghal a ni a, faina kawnga Veng hma la tha te hnenah lawmman pawh hlan niin chungte chu :

Bawlhhlawh thliar hran kawnga hma la tha ber (Best Performing Locality on Source Segregation) - Salem Veng

Faina kawnga hmalak leh mipui zirtirna kawnga hma la tha ber (Best performing locality on carrying out cleanliness activity & awareness) - Ramthar Veng

Cleanliness Week 2021 pual hian Lunglei khawpui chhunga Sanitation worker zawng zawng te chawimawi niin Sanitation hnathawktu thawk tha ber hmeichhia leh mipa thlanchhuah an ni.

Best Sanitation Worker (Female) - Pi Thangbuangi, Ramthar

Best Sanitation Worker (Male) - Pu Vanlalvuana, Electric Veng

Faina Hapta 2021 hawnna program-ah hian Sawrkar department hrang hrang hotute, Village Council, YMA, MJA, Clean Lunglei, leh tlawmngai pawl dang hruaitute an tel a ni.

Cleanliness Week – 2021 hman dan tur tlangpui chu hetiang hi a ni.

October ni 2 - Cleanliness Week hawnna

October ni 4 - ah VC ten mipuite hnenah Cleanliness Week hman mek a nih thu puangzarin faina leh thianghlimna kawnga hma la thar theuh turin fuihna leh ngenna mahni VC huamchhung theuhah a tam thei ang ber leh a darhzau thei ang bera neih tum a ni.

October ni 5 - ah hian chhung tin te mahni in leh a vel tihfai theuh tura ngen an ni a.

October ni 6 - ah khawtlang hruaitu ten vengchhung tihfai hnatlang (voluntary) huaihawt tur a ni a. ‘A hmunlo a bawlhhlawh paihtute ngaihhnathiamloh Ni (No Tolerance Day for Waste Disposal)’ ah hman tur a ni.

October ni 7 - ah Sawrkar pisa leh hmunhma te tih faina ni atan hman tur a ni.

October ni 8 - ah Cleanliness Week kharna hun hman tur a ni. Cleanliness Week 2021 a hmalakna (thlalak) te hi social media hrang hrang - Twitter, WhatsApp, Facebook leh Instagram ah te upload tum a ni