No.2449/2021-2022

Aizawl the 2nd October, 2021: Mizoram hmun dangte rualin tukin khan Champhaiah Faina Hapta 2021 chu ‘Faina-Kan in leh a chhehvel atangin’ tih thupui hmanga bul tan a ni. Zing dar 8:30 khan a hawnna hun CHANEM Building Ground Floor-ah District Level Cleanliness Week Celebration Committee Champhai buatsaihin neih a ni a, he hun hi Champhai DC Pi Maria C.T Zuali chuan khuallian ni a hmanpuiin Faina Hapta 2021 a hawng a ni.

Khuallian Pi Maria C.T Zuali chuan hun rei tawh tak atanga fai tura hmalak a ni chunga kan ka fai tawk lo fo chu veiawm a tih thu sawiin, faina tluantling nei turin mitinte kan thawhchhuah a ngai a, ni, a ti a. Fai tih chen a in ang loh thu sawiin, ram changkang zawkte elpha ve tura theihtawp chhuah a ngaih thu a sawi a. Neitu nihna nen vantlang hmunhmate enkawl a tul thu leh, a mawi leh fai thu-ah mawhphurhna sang tak district mipuite kutah a awm tlat thu sawiin, District nuam leh mawi ber Champhai District hmun mawi leh nuam, sik leh sa nuam tak awmna chu hlutna chang hria a, a tlawhtute tan a hmuhnawm lehzual nan bawlhhlawh paih mai mai lova a paihna hmunah chauh paih thin turin mipuite a chah a ni.

Khawtlang hruaitu leh faina Ambassador kalkhawmte Champhai District fai leh nuam siam kawngah mipuite zirtirtu ni a theihtawp chhuah turin a chah a. Faina hapta chuan faina kawngah thanharhna leh nunphunga faina neih tlat tawhna tur thlen ngei se a duh thu sawiin Faina Hapta 2021 Champhai District a hman turin a hawng a ni.

He hun hi Pi R.Lalnunkimi, DUDO Champhai chuan a kaihhruai a, report kimchang pein veng tina faina Ambassador-te inhmelhriattirna a nei a. Dr. Lallawmkima, DIPRO Champhaiin Faina Hapta puala thutiam lak a kaihhruai a. Women and Child Development Department, Champhai District hmalaknain hmeichhiate himna, chanvo leh intluktlanna tih thupui hmanga thusawi Pi K.Lalrinfimi, Women Welfare Officer hnen atanga ngaihthlak a ni bawk a. Pi Lalbiaklawmi, UD&PA Staff-in lawmthu sawiin hun a khar a ni.

Vawiin Faina Hapta hawnna hunah hian faina kawnga hmalakna hrang hrang leh Azadi Ka Amrit Mahotsav kaltlanga huaihawt hnawm paih mai tur atanga thil tangkai siam chhuah 'Waste to Art' intihsiak lawmman semna neih niin Khuallianin lawmmante hi a hlan a ni.

Veng fai berah Zote thlan niin, faina kawnga hmala tha ber atan Kanan Veng thlan a ni a. Plastic hnawm hman tlem kawnga thawk tha berah Vengthlang thlan an ni bawk. Waste to Art intihsiaknaah Vungsannuami, Zion veng chu pakhatna niin, Lalthlamuana Ralte, Kahrawt veng chu pahnihna a ni a, Lalrawngbawli, Bethel veng chu pathumna a ni. Sanitation Worker thawk tha ber hmeichhia bikah Pi Laltlingliani leh mipaah Pu Lalhmangaihzuala te chu thlan an ni bawk.

Addl. DC Pu Henry C.Lalrawnkima’n Sanitation Worker mi 18 te hnenah chawimawina thuziak a hlan a. Bawlhhlawh thliar hranga paih tura hmalak tanna pual hun hman niin veng tin VC te thuziak cheimawi hlan an ni.

Faina hapta neih chhung hian Champhaiah fai endikna kalpui a ni dawn a. Sawrkar Pisa leh Sikul fai endik turin MJA Champhai District, Veng fai endik turin Sub-Hqrs. YMA, Restaurant, Hotel, Hospital leh Bazaar fai endik turin Sub-Hqrs. MHIP te chu ruat an ni a. Faina kawnga hmalakna leh inzirtirna kalpui tha nitin chhuak Chanchinbu lawmman siam la ni dawn a, faina thupui thlan hmanga Mass Photography Competition buatsaih a ni dawn bawk. Lawmmante hi faina hapta khar ni October ni 8, 2021 ah semchhuah a ni ang.