Vawiin chhun dar 12:00 khan Mizoram MLA General Election 2018 neih tur atan inbuatsaihna kal zelah Serchhip DC Coference Hall-ah Booth Level Officer Training neih a ni a, Pi Sangchhin Chinzah, District Bawrhsap in a hmanpui.

Bawrhsap chuan thu sawiin Booth Level Officer te thawhrimna zarah voters thar eng emaw zat kan nei leh thei hi a lawmawm hle a ni, a ti a. Inthlanna hlawhtling tak nei turin BLO te chu a pawimawh berte zing ami anih thu sawiin, an kova tla emaw anmahni bengvara thawh theih awmte pawh a tul ang zelin thahnem ngai taka thawk turin a ngen a ni. Inthlanna buaipui kawng tinrengah Mizoram kan vannei a, a bikin Serchhip District ah engmah harsatna kan la nei lo hi a lawmawm tak zet a ni, a ti bawk.

He trainingah hian inthlan nia Booth Level Officer ten an hnathawh tur leh an hriat tur hrang hrangte chu Pu Lalvenhima, EO, Pu H. Lalhruaitluanga, SDC leh Pu Ngurthansanga, SDC ten an zirtir a. Serchhip District chhung khaw hrang hranga Booth Level Officer 72 te an tel thei a ni.