Mizoram MLA General Election 2018 neih tur atan inbuatsaihna kal zelah nimin tlai dar 4:30 khan Pi Sangchhin Chinzah, Serchhip District Magistrate leh Pu R. Sathiyasundaram, SP te chuan Pi Sangchhin Chinzah pisa ah thuthar lakhawmtute hmaah inthlan kalpui mek chungchang Joint Press Briefing an nei.

He hunah hian District Magistrate Pi Sangchhin Chinzah chuan, Last Date of withdrawals a Serchhip District chhunga Candidate te dinhmun sawiin, inhnuk dawk tumah an awm loh thu a sawi a. Tin, Candidate te Symbol pek dan leh Electoral Roll anga an Address te chu chanchinbumite hi ziakin a sem nghal bawk. Kawng hrang hranga inbuatsaihna neih tawh dan te sawiin, Randomaization of EVM leh Polling Staff te chu ruahman ang taka tluang taka kalpui an nih tawh thu te, BLO te tana Training hnuhnung ber tur pawh ni 15.11.2018 (vawiin) hian buatsaih a nih tur thute a sawi a. Polling Staff te Training hnuhnung ber tur atana inbuatsaihna tha taka kalpui mek a nih thu a tarlang bawk. Vawiin thleng MLA Election buaipuina kawng tinrengah Journalist ten tha taka an thawhpuinaah lawmthu a sawi a. Thil tul leh hriat duh an neih tinrengah engtiklai pawha biakpawh theih reng a nih thu a hrilh a ni.

Pu R. Sathiyasundaram, IPS, SP Serchhip pawhin inthlanna fel fai leh thianghlim a awm theih nana venhimna kalpui a nih dan leh vawiin thlenga Serchhip dinhmun tlangpui a tarlanga. MCC bawhchhiatna thil te, dan pela hmalakna leh Campaign lam chi thil report engmah tun thlenga a la awm loh thu a tarlang a ni.

District Magistrate leh District SP in Joint Press Briefing an buatsaih hi Pu K. Saitluanga, MIS, DIPRO Serchhip chuan tawiawmin, he Joint Press Briefing hi Election Commission of India in Media Centre kaltlangin District Magistrate leh SP ten Joint Press Briefing an nei tur a ni, tih ruahmanna a siam anga buatsaih an nih thu a sawi a. Election Commission of India chuan, Election buatsaih chhunga tum nga (5) tal Press Briefing hi neih tur a nih thute, a hun tur leh Subject turte thlenga a rawn duan fel sa vek thute sawiin, Serchhip District ah tha taka vawiin thlenga kalpui a nih thute a tarlang ani.