Vawiin hian Serchhip District Addl DC Pu Chuauhnuna, MCS, Cable TV Digitalisation District Nodal Officer ni bawk  hovin Serchhip District chhunga Cable TV Operators chuan Cable TV Digitalisation hmalakna te an thlir ho.

He meeting ah hian Set Tox Box Seeding report ah 65% angin lang mah se hei hi report a luh muan deuh vang mai niin a tunah tak chuan 100% tlin thuak tawh thu Local Cable Operators kalkhawm te hian an sawi a. Report a luh muan chhan pawh District ramri pela signal pe chhuak an awm vang leh District dang ngaihchan ve a tul vang niin an sawi. Tun dinhmunah Multi Systems Operators (MSO) zawmtu Operators thenkhat channel encrypt form a la pechhuak lo an awm nual a, hei hi a chhan chu an MSO atanga a encrypt saa dawng tur an ni a, MSO lamin an la encrypt si loh vangin Local Operators ten an lo encrypt ve theih loh avng nia sawi a ni. Meeting hian sawrkar laipui duh dana encrypt veka pekchhuah a tul avangin heng Local Cable Operators channel la encrypt lo te hian thla khat chhungin lo encrypt vek se, chumi hnuah Nodal Officer Pu Chuauhnuna, Addl DC hovin enfiah ni se, tiin an rel a. Encryption lama harsatna nei te chu an harsatna te State thuneitu sang zawk hnenah thlen sak ni se tiin an rel a ni. Hetihlai hian Serchhip District ah hian Head in the Sky (HiTS) hmanga channel pechhuak pathum an awm ve mek bawk a, heng operators te hi chu engkimah an inchingfel vek tawh nia sawi a ni.

Tin, The Cable Television Networks (Regulation) Amendment Act of 2011 hian DTH hmanga Local Channel lo siam ve pawh a phal loh avangin DTH hmanga local channel pe chhuak an awm chuan lo chhunzawm tawh rih lo se, tiin an rel bawk.

Serchhip District chhungah hian Local Cable Operator hi sawm (10) vel an awm a, an hnuaiah Sub Operators engemawzat an la awm ve leh a ni.