Vawiin September 30, 2014 chawhma dar 10 atang khan Serchhip District Bawrhsap Office leh District Education Office-te Serchhipah, Chhiatrupna lo thleng thei laka himna te, lo inven dan turte leh a lo hmachhawn dan tur; mipuite hnena zirtirna kawngzawh; Sensitization Programme Rally neih a ni a, Serchhip khawpui chhunga sikul naupang, Middle School leh a chung lam zawng zawng, sawrkar leh private sikul te an tel kim vek a, kawngzawh ropui leh hlawhtling tak an nei a ni. Heng school hrang hrangte hi hlawm hnihah inthenin hmar lama mi ten DC Office tual atangin Leisekawt Field lam an pan a, chhim lam atanga lokal ten Bazar atanga tanin an inhmuhkhawmna Leisekawt Field hi an rawn pan bawk a ni.

An intawhkhawmna hmunah hian District Bawrhsap Pi Juhi Mukherjee, IAS chuan thu sawiin Sensitization Rally chu District Administration leh District Education Office tangkawpin National School Safety Programme hnuaia an buatsaih a nih thu te, he programme-in a ken tel, naupangte tan inelna chi hrang hrang buatsaih a lo nih tawh thu te, National Disaster Management Authority leh Mizoram State Disaster Administration-in he district tana hun remchang an siamsak avanga ti thei an nih thu te sawiin he programme atana senso ngai zawng zawng rawn tumsak vektu; Council for Scientific Research – Northeast Institute of Science & Technology te chungah lawmthu a sawi a, hlawhtling taka he rally neih a nih theihna chhan ber chu sikul naupang duhawm tak tak te inpekna vang a ni tiin Education Department leh Traffic Police bakah DC office lama officer leh staff ten an tawiawmnaah thinlung takin lawmthu a sawi bawk a ni.

Pi Juhi chuan lirnghing leh kangmei avanga zirna in thenkhat a chhiatna nasa tak lo thlen tawhna te sawi langin, mi tam takin nunna an channa chhan chu hetiang inzirtirna tha leh ruahmanna felfai hi a awm loh vang a ni a ti a, inzirtirna tha leh ruahmanna tha chuan rikrum thil lo thleng thulah pawh nasa takin chhiatna leh tuarna a titlem thei a ni a ti a, zirna inte chu mihring tam tak an awmkhawm rengna hmun a nih avangin hetiang hmuna himna hi sawrkar chauh ni lovin nu leh pate pawhin kan ngaihtuah a tul a, naupang leh zirtirtute pawhin hriattur tul te an inzirtir nawn fo a tha a ni tiin hetiang Inzirtirna Kawngzawh hi Serchhip khawpui chauh ni lo, Sub Division leh Block Head Quarters lamah te pawh neih theih nise a duh thu a sawi a ni.

Serchhip District hi National School Safety Programme Pilot Block hnuaia awm a ni a, he programme hnuai atang hian zirtirtu tam tak ten school himna lam thil chi hrang hrang an zir tawh thin a, bungrua te pawh engemaw zat an dawng tawh a ni. Sikul naupangte tan pawh inzirtirna lam hawi inelna chi hrang hrang, Painting te, Script Writing leh Poster siam te an lo nei tawh thin a ni.

Vawiina kawng zawhah hian sikul naupangte chuan au hla (Slogan) chi hrang hrang hmangin mipuite hnenah zirtirna an auchhuahpui a, Ram tih kan loh hi changkanna a nih thu te, Kangmei laka ramngaw humhalh hi mitin mawhphurhna a nih thu te, leimin laka kan in leh lo a lo him theih nana tuihawk luankawr leh tuidawn mumal tak siam a pawiamwh thu te leh zirtirna dang pawimawh tak takte hmangin an aurual a, hetiang lam zirtirna lehkhabutê te pawh an sem nghal bawk a ni.

Vawiina Sensitization Programme Rally-ah hian sikul hrang hrang 24 atangin sikul naupang 2000 chuang leh zirtirtu ?hahnem tak an tel a, zaithiam zai te ngaihthlak a nih bakah District Education Officer Pu Zohmingthanga pawhin thu a sawi bawk a ni.