Vawiin khan Health Minister Pu Lal Thanzara chuan Aizawl Press Club-a UNODC leh World Vision: India tangkawpin Mizoram Journalist Association thawhpuia ruihhlo do na kawnga journalist-te tan workshop a buatsaih chu a hawng. “Strengthening Media partnerships to Combat Health and Social Consequences of Drug Use in Mizoram” tih thupui hmangin he workshop kaltlang hian UNODC leh World Vision: India chuan media-te thawhpuina nen ruihhlo do kawnga hmalakna chak leh zawk an neih theih an beisei a ni.

Minister Pu Lal Thanzara chuan Mizoram hun tawn chhoh mekah ruihhlo dona kawnga tan lak zual a pawimawh thu sawiin, hemi kawnga thahnem ngai taka workshop buatsaih a ni chu lawmawm a tih thu a sawi a. Thuthar thehdarhtute chu khawtlang nun a tha zawnga kaihhruai kawngah tih theih tam tak an neih thu leh, an thil ziah leh chhuahin thalaite rilru sutthlek leh hawi her a kaihhruai thin tih hre reng chunga an thuchhuahah te fimkhur a pawimawh zia Minister chuan a sawi bawk a. Mipui mit hip thei thuthar chhuah chakawm tak tak awm thin karah thangthar leh naupang zawkte hruai sual thei tur a awm anih chu tarlang ngamlo hram turin kalkhawmte chu a chah a ni.

Workshop hawnna hun hi Pu Vanlalrema Vantawl, MJA President in kaihruaiin, Pi Lal Thanseii, World Vision aiawh chuan lawmthu sawiin hawnna hun hi a khar a. Dr. Lalnunthara, Centre Director, Social Welfare Department; Dr. Lalchhanhima Ralte, Presbyterian Hospital; Pi Archana Oinam, UNODC; Pu Kunal Kishore, UNODC leh Pu Jimmy LMS Tluanga, AGAPE hnen atangin Mizorama ruihhlo hman chungchang leh ruihlo ngaite enkawl dante, leh media mawhphurhnate chungchanga paper an buatsaih chu ngaihthlak a ni a. Thuzawhfiahna hun te neiin, nilenga hun hman a ni.