District Executive Force leh District Child Protection Unit tangkawpin a buatsaih naupang kum tlinglo dan bawhchhiate leh dan bawhchhiatna avanga tuartuten Police Stationa ngaihngam taka an awm theihna hmun tur Child Friendly Corner chu vawiin tlai dar 4:00 khan Serchhip Police Station ah hawn a ni.

Hawnna inkhawmah hian Pu R. Sathiyasundaram, IPS, Superintendent of Police, Serchhip chuan thusawiin, District hrang hrang zinga a nei hmasa pawl an nih thu leh Lunglei leh Kolasib ah te Child Friendly Corner hi hawn anih tawh thu a sawi a. He hmun siamna atana District Child Protection Unit(DCPU) a thawktute inpeknaah lawmthu sawiin, he Corner thar hi kum tlinglo naupang pawikhawihte enkawl leh venhimna atana tangkai taka hman a nih ngei theih nan leh Serchhip khawtlang tan pawh a tangkai tak a hman anih theih beisei thu a sawi a. Serchhip Police Station building chhawng chung bera Child Friendly Corner an siam thar chu ribbon chep chatin a hawng a ni.

He hunah hian Pi Lalsiampuii Tochhawng, District Child Protection Officer pawhin thusawiin naupang, Police Stationa hruai ngei a tul chang a awm thin a, Juvenile Justice Act leh Rules in a phut angina naupangin nuam ti taka Police Stationa hun an hman theihna tur chu Serchhip Police te leh District Child Protion Unite ten thawhhona tha tak an neih avanga siam puitlin a ni ta chu lawmawm a tih thu a sawi a. Child Friendly Corner ah hian naupang in awmtleina tur thilte leh TV set te dah anih thu a sawi a. Hetiang hmun hi Police Station zawng zawngah siam vek tur anih angin Thenzawl leh N. Vanlaiphai ah pawh siam anih tur thu a sawi bawk.

Child Friendly Corner hawnna inkhawm hi Pu PC Laltanpuia, Addl. SP, Serchhip chuan a kaihhruai a, Police te chu naupang sawi thaihna hmanruaa hman an nih thin thu leh naupangte tan Police Station a kal chu thil nuam ani lo thei a ni, a ti a. Chuvang chuan an tana hmun nuam leh tlangnelna tur hmun siam hi a tul a ni, a ti bawk.

He hunah hian tlawmngai pawl hrang hrang aiawhte, Child Welfare Committee (CWC) te, Juvenile Justice Board(JJB) members te bakah Serchhip Police te, DCPU thawktute leh Serchhip a naupang enkawlna Home hrang hrang a thawktute,Village Council aiawhte bakah thuthar thehdarhtute an tel a. Pi Lalramsiami Sailo, Legal cum Probation Officer, DCPU,Serchhip chuan lawmthu sawina hun a hmang bawk.