Vawiin kha World Blood Donor Day (WBDD) niin, hemi pual hian "Thisen thianghlim mi tin tan (safe blood for all)" tih thupui hmangin Lawngtlaiah chuan Association for Voluntary Blood Donation (AVBD), Lawngtlai leh Govt Region HSS (GRHSS) National Service Scheme (NSS) unit te tang kawp huaihawtin GRHSS Hall-ah hun hman a ni a. Lawngtlai Addl DC Dr Andrew H. Vanlaldika, MCS chu khuallian a ni.

Khuallian Dr Andrew H. Vanlaldika chuan Mizo nih tinuamtu ber pakhat chu kan tlawmngaihna hi a ni a, chu kan tlawmngaihna chu thisen pek chungchangah pawh hmuh theihin a lang thin a, a thlamuanthlak hle a ni, a ti a. Thisen pek chu mi rethei ber tan pawh mi dang tana malsawmna nih theihna kawng tha leh awlsam ber a nih thu sawiin, zirlai naupang kal khawmte chu thisen pek ngai pawimawh turin a fuih a. Thisen pe thei tur chuan hrisel a ngaih avangin, ei leh in tihthat leh zuk leh hmuam leh ruihhlo laka fihlim a pawimawhzia uar takin a sawi bawk.

Vawiin hun hman hi AVBD Lawngtlai Finance Secretary Pu VR Nghaka Hlawncheu chuan a kaihruai a. UPC (MZ) Pastor Rev. Laldawngliana'n hunserh hmangin, AVBD Lawngtlai Asst Secretary Tv. C. Lalhmangaiha'n report a pe a. NSS GRHSS Programme Co-ordinator Pu PT Laljeniara leh AVBD Lawngtlai President Pu Elvis Lalthangzuala te pawhin thu an sawi.

He hunah hian June 2018 atanga June 2019 thlenga thisen pe thate hnenah AVBD Lawngtlai hmingin chawimawina hlan a ni a. Kohhran pawl zinga pe tha ber Lairam Isua Krista Baptist Kohhran Thalai Pawl (LIKBKTP) College Veng Bial niin, unit 95 an pe a; pahnihna Thalai Kristian Pawl (TKP) Nazareth Unit niin, unit 56 an pe a; TKP Paithar Pastor Bial leh TKP Thingfal Pastor Bial te pathumna niin, unit 45 ve ve an pe a ni.

Zirna in leh tlawmngai pawl huangah GRHSS NSS Unit chuan kum kal ta chhung khan thisen pe tam berin, unit 56 an pe a; unit 50 petu Govt Lawngtlai College NSS Unit chu pahnihna niin, District Institute of Education and Training (DIET), Lawngtlai chuan unit 32 pein pathumna dinhmun an hauh thung.

Lawngtlai District-a tun thlenga thisen pe tam ber, unit 49 petu Pu HC Vanlalruatpuia hnenah citation leh trophy hlan a ni a. Hei bakah hian nikum WBDD leh kumin WBDD inkara thisen pe tam mi pali - Pu Elvis Lalthangzuala, Pu Pc. Lalbuatsaiha, Pu Lalramdinsanga leh Tv. VL Hmangaihzuala te hnenah citation leh trophy hlan a ni bawk.

Hun hman zawh hian voluntary blood donation camp buatsaih nghal a ni a. GRHSS NSS unit atangin mipa 31 leh hmeichhia 9 bakah,

ANM School atangin hmeichhia 5 leh mi dang 2 te'n thisen unit 47 an pe thei a ni.

Lawngtlai Blood Bank report-a a lan danin, nikum 2018-19 chhung khan thisen unit 1290 hmuh niin, unit 1264 pek chhuah a ni a. Thisen hmuhna hi tih bik nei lova thisen pek (voluntary blood donation) atangin unit 901 leh damlo tih bik tana pek (replacement) atangin unit 389 a ni a. Voluntary bik hi blood donation camp vawi 32 buatsaih atanga hmuh unit 817 bakah, mimalin mahni duh thua blood bank-a kal chilha thisen an pek (walk in) atanga hmuh unit 84 a ni.