Vawiin khan Food, Civil Supplies & Consumer Affairs Minister Pu K. Lalrinliana'n GMG Zuangtui Godown atangin miretheite hnena man tlawm zawka chini hralhtur phurtu motor pahnih a vailiam. Minister hi Serlui bialtu MLA Pu Lalrinsanga Ralte, Aizawl North-III bialtu MLA Pu C. Lalmuanpuia, MIZOFED Chairman Pu K. Laldawngliana, Supply Department Commissioner & Secretary Pu HL Rochungnuga, Supply Director Dr. Lalhriatzuali Ralte leh official pawimawh dang ten an tawiawm a ni.

He hunah hian thusawiin Supply Minister Pu K. Lalrinliana chuan retailer te kaltlanga supply department in chini man tlawm zawka a hralh thin kha hun engemaw chen tihtawp anih hnu ah tunah bul kan tan tha leh thei ta hi thil lawmawm tak a ni a ti a. Miretheiten chini an mamawh ang te man tlawm zawka an lei theih hi Chief Minister Pu Zoramthanga ngaihpawimawh ber pakhat anih bakah sawrkar intiamna ani bawk a, Sawrkar thar din anih veleh chini sem dan tur ruahmanna siamin theihtawp chhuah a hmalak nghal a ni a ti a, hetih lai hian sawrkar laipui atanga Mizoram State-in chini sem theihna allocation a neih chu AAY beneficiary te tan, thla khat a chhungkaw khatin kg 1 zel an dawn theihna chauh ani a, uluk taka mizoram sawrkarin pawisa a sen belh tur zat te pawh chawhchhuah ani a, eng ang chenin nge chini hi sem theih anih ang tih te ngun taka ngaihtuah a ni a ti a, tun dinhmunah ministry thar budget engmah hman tur ala awm bawk siloh avangin Central Sawrkar atanga allocation pawh kan neih sa AAY beneficiary te tana awm hi a dawngtur diktak te hnenah sem phawt tha bera hriat anih avangin ruahmanna siam ani ta a ni a ti.

Minister chuan Sawrkarin miretheite a ngaihpawimawhna lawmawm a tih thu sawiin anmahni khaikanna tur hmanrua atana tangkai Department enkawltu Minister anihna ah pawh lawmawm a tih thu a sawi a. Supply Department-a thawktuten theihtawp an chhuahna avanga hlawhtlinna hi awm ani tiin lawmthu a sawi bawk a ni.

Minister hian thu a sawi zawh hian Lungdai SDC, Kawnpui SC, Kolasib PDC, Vairengte SDC leh Bairabi SDC a dah tur chini quintal 72.50 phurtu truck leh Aibawk PDC a dah tur quintal 25 phurtu truck te a vailiam nghal a ni.

Mizoram sawrkar chuan heng chini sem tur te supply tur hian MIZOFED a thlang a, March thla khan supply order pawh tihchhuah vek tawh ani a, MP inthlan puan anih avangin Model Code of Conduct puan ani zui a, hei vang hian chini sem hi kalpui nghal theih ani ta lova, inthlan zawh fel anih veleh chini sem theihna tur hian hmalak nghal niin tunah hian AAY chhungkuate hnenah chini thla thum quota (January - March, 2019) sem theih tura peihfel alo ni ta a ni.

 AAY Scheme hnuaiah hian beneficiary chhungkua 26100 an awm a, anmahni bialtu retailer te hnen atang chini hi kg 1 Rs 24 in an lei thei dawn a ni.

Supply Centre hrang hrang 34-a chini pek tur hi Zuangtui-I ah quintal 75, Zuangtui-II ah quintal 98, Aibawk PDC ah quintal 25, Lunglei PDC ah quintal 93.50, Lawngtlai PDC ah quintal 68, Siaha SDC ah quintal 39, Kawlchaw SDC ah quintal 19, Tuipang ah quintal 15.50, Chhingchhip SC ah quintal 8, Serchhip SDC ah quintal 41, Thenzawl SDC ah quintal 12, Saitual PDC ah quintal 19.50, Kawlkulh PDC ah quintal 28.50, Khawzawl SDC ah quintal 26, Champhai PDC ah quintal 57.50, Hnahthial SDC ah quintal 31, Lungdai SDC ah quintal 16.50, Kawnpui SC ah quintal 10, Kolasib PDC ah quintal 22, Vairengte SDC ah quintal 18, Bairabi SDC ah quintal 6, West Phaileng SDC ah quintal 8.50, Phuldungsei SC ah quintal 3, Pukzing SC ah quintal 2, Marpara SC ah quintal 7, Silsury SC ah quintal 2, Tuipuibari SC ah quintal 4, Mamit SC ah quintal 10, Zawlnuam PDC ah quintal 5, Kawrtethawveng SC ah quintal 4, Tuidam SC ah quintal 3.50, Kawrthah SC ah quintal 3.50, Rengdil SC ah quintal 3.50, Kanhmun SC ah quintal 4 a ni.

AAY beneficiary chini man tlawma lei thei hi DCSO Aizawl West hnuaiah 3269, DCSO Aizawl East hnuaiah 3815, DCSO Champhai hnuaiah 3558, DCSO Kolasib hnuaiah 2322, DCSO Lawngtlai hnuaiah 2220, DCSO Lunglei hnuaiah 4056, DCSO Mamit hnuaiah 1878, DCSO Siaha hnuaiah 2285, DCSO Serchhip hnuaiah 1958 an awm a ni.

Minister hian GMG Zuangtui Godown tlawh nghalin Godown chung ruahsur a tui far thin chu karleh thawhtanni a siamtha nghal turin Department hotute a hrilh nghal a ni.

Govt. of India, Ministry of Consumer Affairs, Food & Public Distribution hnuaia End-to-End Computerization of TPDS Operations Scheme huamchhunga Component-I zinga mi Supply Chain Automation (application of FEAST Software) bul chu Mizoramah pawh țan a ni tawh a. A hmasa ber atân FCI - Food Storage Depot (FSD), Tanhril leh GMG Zuangtui (Supply Deptt. PDC lian ber) chu he FEAST Software hmang hian thlun zawm an ni.

He Scheme hian a tum ber chu foodstuff (buhfai) bothlau tur vên leh a sem dan vilzui a ni e.