992/2022-2023
Dated Serchhip, the 22nd June, 2022: Vawiin khan Mizoram Youth Commission, Deputy Commissioner Serchhip leh SIRD&PR tangkawp ten an buatsaih Covid19 hripui avanga state dang atanga rawn kirte puala eizawnna lam inzirtirna (Livelihood Generation for Returned Migrant Workers due to Covid19) Serchhipa neih chu a kharna hun Serchhip District Panchayati Resource Centre ah buatsaih a ni a, Pi Nazuk Kumar, IAS, Deputy Commissioner, chu khuallian a ni.

Khuallian chuan, training chhuakte chu a lawmpui thu hrilhin training buatsaih anih theih nana bultumtu Mizoram Youth Commission chungah lawmthu ka sawi a, helaia kan innghahna hmun an hmunhma leh bungrua engkim min hman tirtu SIRD & PR chungah pawh kan lawm hle a ni. Kan thil zirte kha ram leh khawtlangin kan mamawh tak tak thilte an nih avangin in kal zelna turah hmabak a eng tha hle niin kan ngai a, taima taka bei chhunzawm turin kan ngen che u a, khang in thilthiam takte kha a taka in thawhchhuah pui chuan Mizoramin hma a sawnna kawngah tha thawhtu pawimawh tak in ni dawn tihna a ni, tiin zirlaite chu a chah a. Mahnia bul tanna nei remchang lote pawhin sawrkarin bultantute tana scheme hrang hrang PMEGP leh Loan Scheme dang a neih te in ngaihven ang a, hmasawnpui ngei in tum dawn nia a ti a. Degree hi thil pawimawh ber a ni lova thiamna, engemaw siamchhuak emaw thar chhuak thei khawp thiamna hi a pawimawh zawk chu a ni. Vawiina thiamna thar in neihte hi lo tipung zel ang che u tiin thiamna pawimawhzia a hrilh bawk. Khuallian hian zirchhuakte hnenah hian Certificate leh hmanraw dang an dawnte a hlan nghal a ni.

He hun hi Pu Lalmuansanga Ralte, Addl. DC in a kaihruaia, zirlai chhuakte chu an thil zirte in lamah chhunzawma, intuaihriam zuia, chhungkaw tan te, sum leh pai thawhchhuahpui nan tea hman zui tum ngei tura an beisei thu a chah a ni.

Training an kalpui dan tlangpui hi trade hrang hranga zirtirtute aiawhin Pu Vanlalhruaia, Head Faculty, SIRD & PR, Dr. H. Vanlalrawna, VO, District Vety Hospital leh Pi Lalhmangaihzuali, M Sc, Food & Nutrition ten an pe a. Zir chhuakte aiawh hian Pu F. Lalrinawma, Khawtetlang chuan thusawina hun a nei bawk.

He Training hi May ni 4 khan hawn niin trade pathum Cement Mistiri, Vawk vulh dan leh Food Processing ah te buatsaih an ni a, mi 80 ten he training hi an kal a ni.

Attachment

  • Loading attachment...