993/2022-2023
* MIZO FILM THAR “KA U LIANA” CHU A PIRATE COPY NASA TAKA THEHDARH A NI.
* A MAWHPHURTU, AIZAWL DISTRICT BASKETBALL ASSOCIATION (ADBBA) REFEREE PAKHAT MAN A NI.
* HE FILM HI SCREEN RECORDER HMANGA RECORD NUN, TELEGRAM HMANGA THEHDARH A NI.
* A FILM SIAMTUTE LEH A CHHUAH CHHAWNNA OTT PLATFORM HIAN CHENG NUAIH 10 CHUANG AN CHAN PHAH NIA NGAIH A NI.
KAMKEUNA
Mizo film thar “Ka U Liana” chu a pirate copy, Telegram velah nasa takin miin an inthawn darh a, he thil hi Cyber Police Station, CID(Crime) chuan ngawrh leh rim taka an chhui hnuah a mawhphurtu ni ngeia hriat, Lalremsiama(22) s/o Lalbiakzuala, Bethlehem Vengthlang, Aizawl chu man a ni.
A THU LAIMU
Pu Lalremruata, CEO, Runmawi App hnen atangin an platform-a tunhnaia an movie release thar “Ka U Liana” chu an phalna lovin thehdarh a nih thu leh he movie thar hi mipui lamah a tlak nat avangin sum tarn tak hai lut thei tura beisei a ni a, a tlem berah he thil avang hian cheng nuaih 10 vel an hloh thu report dawn a ni a. Telegram-a thawn darh hmasatu pawh “Melvyn YT” a nih thu complaint-ah hian a sawi bawk a ni.
A CHHUINA
Telegram account, “Melvyn YT” hi a account leh a account siamna phone number te chhui chhunzawm nghal a ni a, Truecaller atangin “Ref Siama ADBBA” tia a lan avang leh technical investigation lamah a number neitu hi Lalremsiama, Bethlehem Vengthlag a nih thu hriat a ni. Aizawl District Basketball Association lam atangin Referee zingah Lalremsiama, Bethlehem Vengthlang a awm thu hriat a ni bawk. Bethlehem Vengthlang khawtlang hruaitute puihnain accused hi zawn chhuah a ni ta a ni.
INMANNA
O/C Cyber Crime PS hnuaiah SI Lalmuanpuia leh a team te chuan accused hi manin, a digital device neih ang ang te nen Cyber Crime PS-ah hruai a ni.
INDAWPNA LEH INPUANNA
Ngun taka dawp a nih hnuah accused hian “Ka U Liana” tih film hi dan ang thlapa Runmawi app atanga a lei thu leh, ni thum chhung chauh en theih a nih avangin a thiante hnenah a account password te pein a entir ve a, a account hi an dil nasat avang leh ni thum a ral tawh dawn avangin screen record-a, a theih phei chuan a thiante hnena hralh chhawn leh a rilruk tak thu a inpuang a ni.
Youtube-ah te screen record dan inzir chawpin movie hi a record ta a, Telegram-ah thawnin a lo darh ta a ni.
Cyber Crime PS Case No. 64/22 u/s 63 of Copyright Act & Sec 72 of IT Act siamsak niin accused hi man a ni a. He movie thehdarh kawnga inhnamhnawih ve midangte pawh chhui chhunzawm zel a ni.
Movie leh thil dang pawh pirate copy lo siam te, lo thehdarh te hi dan bawhchhiatna khirh tak a ni a, IPC, IT Act, Copyright Act & Cinematograph Act adt. hmanga hrem theih a ni. Chuvangin mi thawhrimna leh insensona te zahsak a, pirate copy siam leh thehdarh ching lo turin mipuite kan inngen a ni.
