1905/2025-2026

Dated Serchhip, the 29^th August, 2025: Vawiin khan Government Serchhip College chuan ‘Annual Day cum Graduation Day’ hmangin Serchhip DC, Pu Paul L. Khuma chuan hmanpuiin Graduate thar te hnenah Certificate a hlan a ni.

Govt. Serchhip College HD Rosanga Multipurpose Hall-a ‘Annual Day cum Graduation Day’ ah hian Serchhip DC Pu Paul L. Khuma chuan zirlai Graduate thar te a lawmpui thu sawiin, zirna lamah kailawn pawimawh tak an zawhchhuak ta tih a sawi a. An hmalam hunah sawrkar hna hrang hrang, Group A thlenga thawk thei turin Exam an hmachhawn thei tawh tih sawiin, hetiang an thlen theihna tur atana thawktu an Zirtirtute leh an nu leh pa te hnenah lawmthu sawi turin a chah a. Zirlai kalkhawmte chu tum leh hmathlir (Vision leh Goal) an nei lo a nih chuan nei tura chah bawkin, chumi atan chuan tun atanga bul tan tur leh theihtawp chhuaha hma an lak chuan an hlawhtlin tur thu a sawi a. Hei bakah hian an thil tihna kawng tinrengah Isua Krista chu entawnah nei turin a chah bawk a ni.

Serchhip Bawrhsap chuan ruihhlo do chungchang pawh sawiin, zirlai kalkhawmte chu Drug leh ruihhlo dang an la ti lo a nih chuan tichhin miah lo turin a chah a. An lo ti tawh palh a nih pawhin mithiam te pan-a sim tum turin a chah bawk a. Hei bakah hian Social Media hman kawngah pawh fimkhur a pawimawh thu sawiin, thil mawi lo lam phei chu mipui ah tlangzarh mai lova hma la theitute hnena thlen thin a pawimawh zawk thu a sawi bawk.

Principal Pu C. Laldintluanga’n inlawmna thu sawiin nu leh pa ten an fate chu an kuta an dah ngam avangin lawmawm a tih thu a sawi a. Harsatna hrang hrang paltlanga graduate ta te chu a lawmpui thu sawiin an kal zelna turah duhsakna a hlan a ni.

Govt Serchhip College hi kum 1973 a din niin subject hrang hrang 13 zir theih niin vawiin khan graduate thar mi 77 hnenah certificate hlan an ni.