1901/2025-2026

Dated Serchhip, the 14th October, 2025: Vawiin khan Serchhip District Development Co-ordination and Monitoring Committee (DISHA) chu an Chairman, Pu Richard Vanlalhmangaiha, Member of Parliament (Lok Sabha) hovin Serchhip DC Meeting Hall-ah an ṭhukhawm. Sawrkar laipui Centrally Sponsored Scheme kalpuitu Department 21 an tel a ni.

Lok Sabha MP Pu Richard Vanlalhmangaiha chuan India ram chu kum 2047 ah ram changkang (developed country)-ah Sawrkar Laipui chuan hlan kai tumin tan a la a, chumi atan chuan a bulthumah DISHA hi a pawimawh em em a ni, a ti. Serchhip District chuan hmabak eng tak a nei tih sawiin meeting-a kalkhawmte chungah lawmthu a sawi a. Mipui leh ram hmasawnna tura theihtawp chhuah theuh turin a sawm a ni.

Serchhip DC Pu Paul L Khuma, DISHA Member Secretary pawhin sawrkar laipui scheme khawihtu department hrang hrang kalkhawm an nih avangin an scheme khawih theuhah engtin nge an inpuihtawn theih anga, a englaiah nge thawhhona (convergence)an neih theih ang tih rilru pu chunga agenda te rel turin member te a ngen a ni.

Vawiin meeting ah hian PHE, Supply, Samagra, Agiculture, Horticulture, Mission Shakti, CDPO (Serchhip & E.Lungdar), DPO, Chief Medical Officer, Lead District Manager, UD&PA, Power and Electricity, Commerce & Industries, PWD, Revenue, Rural Development, Fisheries, DLAO, Irrigation, AH&Vety leh NHIDCL ten an office kaltlanga scheme leh programme an kalpuite chipchiar takin an sawifiah a. Hmalakna an kalpui dan te, hmachhawp an neih te, hlawhtlinna an lo neih tawh te vawiin meeting ah hian an tarlang a ni.

DISHA hi sawrkar laipui hmalakna viltu Committee a nih piah lamah Department hrang hrangte inkarah thawhhona tha siam a, an Scheme a hlawhtlin theihna tura thawhho dan kawng zawng tura din a ni a. Tun tum DISHA meeting neih zawh tak hi kumina Serchhip District-a thutkhawm vawikhatna a ni.