Tunkar Thawhlehni, Oct. 16 atanga neih tan Serchhip District Level Panchayat Yuva Krida Aur Khel Abhyan (PYKKA) Sports chu Vawiin chawhnu khan Serchhip Field No. – II ah a kharna inkhawm hmangin zawhfel a ni ta a, he Sports kharna inkhawm hi District Bawrhsap, Pu Lalsangliana chuan hmanpuiin he huna kal khawm infiammite chu chakna leh hlawhtlinna an neih zel theih nan insumtheihna nei turin a chah a, a bik takin anmahni tichhe thei ruihtheih thil laka inthiarfihlim tura chahin hemi piah lamah anmahni kaihruaitute thu awih turin a chah bawk.

Khuallian chuan sum leh pai harsa tak karah he Sports hlawhtling taka neih a ni chu lawmawm a tih thu sawiin, hemi atana SportsAssociation hrang hrangte inpekna leh thawhrimna chu lawmawm a tih thu a sawi a, kar leh atanga State Level PYKKA Sports neih tura hlawhtlinna an neih ngei theih nan infiammi te chu duhsakna a hlan bawk a ni.

Vawiin a PYKKA Sports kharna inkhawm hi Pu Zolawma, District Education Officer leh Vice Chairman, Organising Committee ni bawk chuan a kaihruai a, infiamna discipline chi hrang hrang 10 ah infiammi 504 te an inelin lawmman te hi District Bawrhsap, Pu Lalsangliana chuan a sem a ni.