Vawiin chawhma dar 11:00 khan Serchhip District Level Vigilance and Monitoring Committee chu bCo-Chairman Pu Lalhmingliana (MP, Rajya Sabha) kaihhruaina hnuaiah neih a ni a, Central Sawrkarin mipuite hmasawnna atana programme hrang hrang a duante leh a thawh zui dante thlira sawi ho a ni.

Co-Chairman Pu Lalhmingliana chuan 13th Finance Commission atanga PHE Department ten Fire Hydrants pahnih an siam chu district dangah a la hriat ngai loh thu sawiin tha a tih thu leh remchang a tih thu uar takin a sawi a, district dangte pawhin siam ve se thaa a rin thu a swi bawk a ni. Fire Hydrants hi Tuizem lian, Litre 70000 dawng a ni a, kang thelh motorin rikrum thila tui a chawi mai theih tur dahkhawlna a ni a, New Serchhip leh Serchhip Damdawiin bulah an siam a ni. Tin, he meetingah hian DRDA Project Director Pu FJ. Liantluanga pawhin MGNREGS hmangin tun sawrkar kum kal mekah ni 67 inhlawhna an kalpui tawh thu leh tun dinhmunah pawisa awmsa hman zawh vek tawh a nih thu a sawi a, Central lamin an rawn pek leh mek avangin kumin chhungin ni 100 inhlawhna pek leh theih ngei an inbeisei thu a sawi bawk.

PHE Department-in an enkawl thin Total Sanitation Campaign hnuaia mi rethei te tana ek-in siamsak thin chu Central Rural Development Ministry lamin MGNREGS nena kal kawptir (Converge) tur tia Mizoram Rural Development Department a hriattir thu Project Director, DRDA chuan sawiin MGNREGS hna enkawltu chu Village Council-te an ni si a, MGNREGS leh TSC hi converge tur a nih dawn chuan a Project enkawltu tur tu zawk nge ni ang tih thuah State Sawrkarin ruahmanna a siam thuai ngaia an hriat thu an sawi a ni. Tin he programme hnuaia sum bituk zat hi phai ram nen ang khata siam a ni a, Mizoramah chuan bungraw man leh a thiarvelna te a to bakah labour man te pawh a san bik avangin thuneituten central lamah rate sang zawka nawr dan ngaihtuah tula an hriat thu an sawi bawk.

He meetingah hian IWMP hnuaia Project hrang hrangah Central leh State atangin fund hmuh a mumal lovin a la tlem em em a, hei vang hian PIA thenkhat phei chuan IWMP enkawltu tura an lak WDT te chu hlawh pek tur a awm tawh rih loh avangin hreh tak chungin January 2013 atang khan bang lovin an lo chawlh lailawktir tawh thu an sawi a, tin PMGSY hmanga thingtlang khaw kal kawng laihnaah pawh khaw thenkhat tuilak kawng tihchhiat a nih thin thute sawilan a ni a, hengte hi a enkawltu department ten a tichhetu contractor-te chu rintlak ngei a siamtha leh zel turin hriattirna pe se an ti bawk a ni.

He meeting hi Member Secretary, Serchhip DC Pi Juhi Mukherjee chuan a vawikhat telna a nih thu leh tha taka meeting neih a ni chu lawmawm a tih thu a sawi a, he meeting-a sawiselna leh rawtna awm ang angte chu theihtawpa enzui a nih tur thu a sawi bawk a ni.