182/2026-2027

Dated Serchhip, the 17th April, 2026: Vawiin khan Women and Child Development Department hnuaia Serchhip ICDS Project buatsaihin 8th Poshan Pakhwada hnuaiah 'Early Childhood Care and Education Festival and Indigenous Toys Day' hman a ni.

Serchhip Kawnpui VC Hall-ah hun hman niin hun hmanpuitu Serchhip RD Block-a Block Development Officer (BDO) Dr. Lalramdinthara chuan zir mite'n an sawi danin, naupangte thluak hi kum 6 an tlin hmain an damchhunga an thluak than dan tur zaa 85 a than hman tawh thu a sawi a; amaherawhchu kan enkawl that loh leh kan kaihhruai that tawk loh avangin an nih tur ang ni phak lo an awm theih thu sawiin, kawng hrang hranga hma an sawn theihna turin heng Poshan Pakhwada hmalaknate hi duan a nih thu a sawi a. Naupang kaihhruai dan hrang hrang ICDS-a thawkte'n an sawi leh zirtir thinte chu hmang tangkai theuh turin, he huna kalkhawm nute chu a chah bawk a ni.

He hunah hian Serchhip ICDS Project-a Child Development Project Officer (CDPO) Pi Caryll Lalpari pawhin kum tin Poshan Abhiyan hnuaiah Programme pawimawh tak tak pahnih an hman thin thu sawiin, kumin hian April 9 atanga 23 chhungin 'Poshan Pakhwada' hi hmangin September thla-ah Rashtriya Poshan Maah an hman leh dawn thu a sawi a. Tuna Poshan Pakhwada an hman meka hmalakna an kalpui tur hrang hrangte a sawi bawk.

Vawiina he hun hman hi Serchhip ICDS Project-a Circle Officer (CO), Pu Lalhriatkima chuan kaihruaiin inelna hrang hrang neih a ni a, naupang kum khat hnuai lam tan Baby Crawling, kum hnih hnuai lam naupang hrisel, kum khat atanga kum thum inkar tan leh kum thum atanga kum ruk inkar tan Quadrupedal race buatsaih niin, Govt. Serchhip College zirlaite'n TLM Toys Making Competition an nei bawk a ni.