3058/2023-2024

Dated Serchhip, the 15th December, 2023: Mizoram Legislative Assembly Inthlanpui neih zawh takah Serchhip District chhunga Constituency pathum - 26-Serchhip, 27-Tuikum leh 28-Hrangturzo-a candidate tin te account tihfel dan tur inhrilhriatna hun chu vawiin khan Serchhip DC Pu David Lalthantluanga hovin DC Meeting Hall ah neih a ni.

DC Pu David Lalthantluanga chuan Election Commission of India -in MLA candidate tin te sum hman dan felfai taka vawng tura a phut dan leh hman a phalsak chin cheng nuai 28 a bithliah thu a sawi a. Candidate zawng zawng te hian ECI kaihhruaina anga an account te an tihfel loh chuan kum 3 thleng election a ding thei lo tura hrem theih an nih dan te a sawi fiah a ni.

Inthlan chhung hian Inthlanpui atana ruatbik Accounting Team te chuan shadow account vawngin candidate te leh political party te sum senso hi ngun taka chhuiin, account fel takin an vawng a. Candidate te aiawh Expenditure Agent te hian sum leh pai an hmanchhuah dan account an vawng bawk a. Expenditure Agent te leh Accounting Team te record enmil dan tur vawiinah hian training neih a ni.

Vawiinah hian Serchhip District chhung Assembly Constituency pathuma RO leh ARO te bakah candidate te leh Expenditure Agent te, inthlan chhunga accounting team member te he training ah hian an tel a ni.