Nimin chawhnu dar 3:00 khan Pi Sangchhin Chinzah, District Election Officer hovin DC Conference Hall ah MLA inthlan pui kalpui meka department hrang hrangin Election kaihhnawih thil an office theuhva lokal lo buaipui tur bika an ruat, Nodal Officer ten meeting an nei.

District Election Officer chuan Election thil umzuitu tur bik, department hrang hranga inruat chhuah tir anih chhan sawiin, Election lamah hnathawh tur tam tak a awm laiin kan hnathawh kal lai pangai thawh reng tho a lo ngai a. Chung hna pawimawh hrang hrang kan thawh te khaihlak leh fel lo awm lova; a bik takin inthlanna buaipui hna phei chu tluang taka a kal theih nan a nih thu a sawi a. Office darkar, zing dar 9 atanga tlai dar 5 tha taka zawm tura hrilhin, Election lehkha pawimawh, action lakzui mai tur chite a tam avangin lehkha semtute an hawihai tur a ni lo, tiin kalkhawm te hi a chah a. Election thilah engemaw tihsual palh a awmin Nodal Officer chuah nilovin Head of Office pawhin mawh an phur a ni, tih a hrilh a ni. 

Pi Sangchhin Chinzah hian inthlannaah sawrkar hnathawk, inthlannaa duty zawng zawngte pawhin vote an thlak ngei a beisei thu a sawi a. Officers mahni thawhna hmun lama Voters ID la sawn lote pawhin kokim taka vote kan thlak theih nan in transfer theuh tum ni se a duh thu a sawi a. Voters ID Transfer a harsat loh avangin duh hunah a thlak let leh theih mai tho a ni, a ti.

Nodal officers te inhmuh khawmnaah hian sawrkar hmalakna kalpui mek leh Model Code of Conduct in a khuahkhirh chin hmalaknate sawi chhuaha sawiho a ni bawk a. Department hrang hrangten sawrkar Policy an kalpui meka zawhna an neih te zawhna hun neiin Pi Sangchhin Chinzah, DEO leh Pu Lalvenhima, EO ten an zawhna te an chhan sak a ni.

Superintendent of Police Pu R. Sathiyasundaram, IPS pawhin thusawiin Law & Order kenkawhna kawng tinrengah an inpeih at reng thu a sawi a, a tulna apiangah a tul hun apiangah che chhuak tura an inralrin reng thute hrilhin, Department hrang hrang hotute chu inpawh tlang taka hnathawh puiah a sawm nghal a ni.