Vawiin khan Electoral Roll, Special Summary Revision 2013 neih tur chungchangah Serchhip District Level Standing Committee-te, District Election Officer leh Deputy Commissioner ni bawk Pu Lalsangliana hovin a Office Chamber-ah an thukhawm a, he hun kaihruaitu DEO Pu Lalsangliana chuan Electoral Roll-ah hian India khua leh tui dik tak, a chuang tur dik takte chauh chuang se tih hi official-te chuan kan duh dan a ni tiin thuneitute theihtawp chhuaha thawhpui turin Political Party, NGO te leh Media te a sawm a, Foreigners te hi min venpui rawh u a ti. District Election Officer chuan Vai kan tih mai heng laia awmphung pangai a rawn awmte hi chu India khua leh tui an nih avangin an khaw lama Electoral Roll-ah an awm tawh lo tih finfiahna lehkhate an neih kim a, Electoral Roll-a rawn inziah luh ve an dil a nih chuan kan lo thun ve mai hi an dikna chanvo a nih thu a sawi lang bawk a ni. Tun dinhmunah hian Serchhip District-ah Assembly Constituency 3 awmin 26 – Serchhip (ST) A.C, 27 – Tuikum (ST) A.C leh 28 – Hrangturzo (ST) A.C te an ni a. Voters awm dan pawh hetiang hi a ni.

Tin Service Voters awmzat pawh Serchhip Constituency-ah 116, Tuikum Constituency-ah 89 leh Hrangturzo Constituency-ah 87 an awm a, district pumpuia Service Voter awm zat chu 292 a ni. Serchhip District a Constituency pathumah te hian Booth Level Officers (BLOs) - 67 zet an awm a, Designated Officers (DOs) - 67 an awm bawk. Serchhip District-a Voters awm zawng zawng hi an thlalak tel a EPIC siamsak vek(Epic Coverage : 100%) an ni tawh a ni. Tin, EPIC tibo tan anmahni bialtu Booth Level Officer/Designated Officer-te hriatpuina lehkha kengin Election Branch-ah engtiklai pawhin Rs. 25/- chawiin a siam tir theih a, EPIC siamthat ngai (Eg. Spelling diklo, hming bul leh tawpa hnam hming leh a lamtawi, etc.) te tan a siamthat tir theih bawk a, hming/Pa hming etc. hming danga thlak hlawk erawh chu phal a ni lo a ni.

Tun tum Special Summary Revision of Electoral Roll-ah hian dt.1.1.2013-a kum 18 tling turte tan inthunluh a dil theih dawn a; hei bakah hian siamthat, paih leh insawn te a dil theih bawk a ni. Electoral Roll, Special Summary Revision 2013 neih tur atan hian Oct. ni 1, 2012 khian Draft Roll tarchhuah a ni anga, Oct. ni 1 - 31, 2012 chhung sawiselna hun hawn a ni anga, Oct. ni 6 leh ni 9 ah Roll hi endik niin Dec. ni 1, 2012 thleng Electoral Roll-a thunluh dilna leh paih dilna hun hawn a ni ang a, 1st - 31st, Dec. chhungin Final list peih tur niin Jan. ni 5, 2013 ah Electoral Roll thar tihchhuah a ni dawn a ni.