Vawiin chawhma dar 10:00 khan Ethics Committee bul tumin New Serchhip YMA Hall-ah ‘Rorelna Dik’ Seminar neih a ni a, a huaihawt hna leh buaipui ngai dangte hi Serchhip District Bawrhsap Office-in an thawk a ni.

He Seminar hi hun hniha then niin hun khatnaah hian Major Dr. J. Thanruma Secretary, Ethics Committee-in inlawmna thu a sawi zawhah Rev. C. Rosiama thu ziah ‘Rorelna dik: Bible-in a sawi dan’ tih chu ngaithla a sawi ho zui a ni. Inlawmna thu sawitu Major Thanruma chuan Ethics Committee chu tuna kan sawrkarin an manifesto-a ‘Val Upa Committee’ din a lo telh anga ‘Ethics Committee’ hming vuaha lo din a nih thu a sawi a. Kalkhawmte hnenah Ethics Committee kalphung, a hnathawhte leh a hlawhtlina chi hrang hrangte a sawi bawk. Major Thanruma chuan he committee-ina kan rama thil thlengte ngun taka a zir reng thu leh an thiltih te an puanzar vek kher lem loh thu a sawi a, mipuite hnena tarlan ngei awma an ngaih erawh chu Chief Minister Office, Media Cell kaltlanga an thehdarh ve thin thu a sawi a ni.

Rev. C. Rosiama, Ethics Committee Chairman chuan Israelte chu zalenna suala hun rei tak an buai hnuah an han zalen khan rorelna dik an lo ngaihthah avanga harsatna an tawh thu sawiin keini pawh hi zalen kan nih hnu hian ‘Rorelna dik’ hi kan hnamin a thil mamawh ber a lo ni ta a ni a ti a. Kan ram thuvawnah hi chuan dan ang thlapa tih dik chauh ni lovin felna nen a inkawp ngei bawk tur a ni tiin felnaah chuan dikna leh thatna a inkawp tlat a ni a ti.

Inkhawm thawhhnihnaah hian Rev. C. Lalsangliana, Ethics Committee member thuziah ‘Rorelna dik: Mizoramah’ tih chu ngaithlaa sawi ho leh a ni. Rev. C. Lalsangliana chuan kan rama rorelna fung lo chelh tawhte dinhmun tlangpui tarlangin kan ram rorelna tihmelhem thintu thenkhatte chu sawrkar hna lak leh sawn thu te, laina induhsakna te, hleprukna te, exam result fel lo thin te, mipui nitin mamawh harsa leh kawngpui chhe lutuk thin te, zangna dawmna leh ram hruaitute dinhmun inthlak chak lutuk thinte hi an ni thin tiin neitu rilru pua a chhe lai siamthatu nih theuh tum turin kal khawmte a chah a ni.

He Seminar hun khatna hi Rev. R. Lalrinsanga’n kaihruaiin a hun hnihna Upa Lalnilawma Colney chuan a kaihruai vethung a, he huna tel tur hian sorkar hnathawk UDC chung lamte chu kal tura tih an ni a. An ni bakah hian kohhran hruaitu, school zirtirtute leh college lecturer te, tlawmngai pawl hrang hrang te leh chanchinbu mite sawm an ni a, an kal tha hle a ni.