3659/2023-2024

Dated Serchhip, the 5th February, 2024: Vawiin khan Serchhip SP Pu MS Dawngkima chuan Serchhip DC Conference Hall a inkhawm buatsaihah kangmei ven hapta ‘Fire Prevention Week 2024’ a hawng.

Kangmei ven hapta thupui ah “Thapui thawhin kangmei chhuak tur i veng ang u” tih chu hman a ni a. SP Pu MS Dawngkima chuan Mizoram hmun hrang hrang dinhmun thlirin kangmei ven kawngah tan lak nasat a ngai a, Fire Prevention Week hman pawh a pawimawhin a tul hle a ni, a ti. Kangmei hi chi hnih - ram kang (forest fire) leh in kang (domestic fire)-a then a ni a, ngaih pawimawh ve ve a tul a, kangmei ti chhuak lo turin kan zavaiin kan fimkhur tur a ni, khuallian chuan a ti a. Kangmei veng tur hian sawrkar leh tlawmngai pawl te chauh tih tura dah lovin, kan zavai a kan tih tur leh mawhphurhna a nih dan te, Fire Prevention Week kan hman chhung chauha vei lova, nitina kan tih tur leh nunpui tur a nih thu te, leh kangmei ven a tulzia zirtira hrilhchhawng tu tur kan nih thu vawiin programme ah hian Pu MS Dawngkima chuan a sawi a ni.

Thenzawl DFO Pu Lalbiakchama Chawngthu, Serchhip District Fire Prevention Committee Member Secretary ni bawk chuan kangmei ven kawnga Mizoram pum leh Serchhip dinhmun report tlangpui he hunah hian a sawi a. Mizo lo neih dan, lo vata hal thin kan nih avanga kan ram ngaw chereu chho zel dan te, lo hal hun laia tihsual palh avanga kangmei lo chhuak thin te, fimkhur loh avanga ram ngaw kang thin te avanga Mizoram chhunga ram ngaw chhah tha kan neih tlem tak zia te DFO chuan a sawi a, fimkhur leh zual turin mipuite a chah a ni.

Serchhip District ah hian ram ngaw zau zawng 80.47% a ni a, heng zinga 16.8% chu ram ngaw chhah tha Very Dense Forest (VDF) a ni a. India ram pumah Mizoram hi ram zau zawnga tehin Forest Area nei zau ber niin ISFR 2021 record-a a lan danin 84.53% chu forest in a tuam a, amaherawhchu VDF area erawh 0.74% chauh niin India hmarchhaka VDF nei tlem ber kan ni. Jhum cultivation avang leh ram ngaw kan nasat avangin Mizoram chhunga ram ngaw kan neih te a tlahniam zel a, ISFR report hnuhnung berah chuan kum 2020 aiin 2021 ah ram ngaw zau zawng hi 0.88% in a tlahniam a ni.

Kalkhawm ten kangmei veng tura thutiam Pledge on Fire Prevention Week, 2024 an nei a. Thutiam chhamrualna hun hi Serchhip District MJA President Pu C.Lalhminghlua’n a kaihruai a ni.

Vawiin programme hi Pu RL Chhuanawma, Honorary Wildlife Warden, Serchhip District chuan a kaihruai a. Serchhip Sub Headquarters YMA President Pu Kawlthuama pawhin thu a sawi a. N.Vanlaiphai DFO Pu C.Lalkhawthanga’n lawmthu sawina hun a hmang bawk a ni.