3658/2023-2024

2024 Ramtuk thla ni 5: Vawiin khan Kolasib District Level Fire Prevention Committee leh National Service Scheme, Govt Kolasib College te ṭang kawp huaihawtin Fire Prevention Week (Kangmei Ven Hapta) 2024 hawnna hun chu St Joseph's Parish Hall, Kolasib-ah hman a ni a. Mizoram Legislative Assembly Deputy Speaker Pu Lalfamkima, Kolasib bialtu MLA chuan Khuallian niin a hmanpui.

Khuallian Pu Lalfamkima chuan Mizote chu pi leh pu hun lai aṭanga tlang ram lo nei mi, kum tina lo hal ṭhin kan ni a; mahse, kan pi leh pute khan kangmei tihchhuah an hlau em em a, uluk taka mei kawng sialin, kangmei tichhuak lo turin an fimkhur ṭhin, a ti a. Tunlai hunah kangmei kan tichhuak nasa ta lutuk chu veiawm a tih thu sawiin, ramngaw hlutna leh kangmeiin nghawng a neih pawizia kan inzirtir uar deuh deuh a ṭul a ni, a ti a. Khuarel thil vanga kangmei chhuak chu awm bawk mah se, a tam zawk chu mihring awm hlei leh inthlahdah vang a ni a; kan fimkhurna aṭangin kangmei chhuak tur tam zawk chu pumpelh theih a ni, a ti.

Khuallian chuan department hma lakna thlawp tlattu village council leh tlawmngai pawlte inpekna fakin, kangmei chhuah changa tlawmngaia ṭhelh tura thawk chhuak ṭhinte chu chhuanawm a tih thu a sawi a. Mizoramin kan thil neih hlu berte zinga mi, kan tlang ram mawina te, kan ramngaw leh a chhunga cheng nungchate chu khualzinte hipna hmanrua atan ṭangkai taka hman theih a ni a; chumi tur chuan kan nawmsip atana silai kan chelek ṭhin te, ramngaw kan tihchereu ṭhin te hi sim a, kangmei chhuak tur ven leh ramngaw leh nungcha humhalh a ṭul tak zet a ni, a ti a. Kangmei chuan ngaw leh a chhunga cheng nungchate a suat a, tuihna leh boruak thianghlim nasa takin a tichhe bawk tih sawiin, thapui thawha kangmei chhuak tur veng a, ram nuam zawk siam tura ramngaw leh nungcha humhalh kawnga tha thawh turin mipuite chu a sawm a ni.

Kangmei Ven Hapta hawnnaah hian PCI Kolasib Vengthar bialtu pastor Rev. Lalhruaitluanga Ralte chuan hunserh a hmang a. Kolasib DRDO Project Director Pu Lalmuan Puia chuan inlawmna thu sawiin, DLFPC Member Secretary, Kolasib Forest Division-a Divisional Forest Officer Pi Margaret Lalramchhani chuan report a pe a. Govt Kolasib College-a Assistant Professor Dr Zothansangi chuan powerpoint presentation hmangin mipui kal khawmte chu "kangmei leh a nghawng pawizia" a zirtir a. Kolasib Forest Range-a Range Officer Pi Laltleipuii kaihhruaiin mipui kal khawmte chuan ram tikang lo tur leh kangmei ven kawnga mi dangte zirtir turin thutiam an chham rual a. Zaithiam zai te ngaihthlak niin, Kolasib Forest Division-a Assistant Conservator of Forests Pu Thanliana Hauhnar chuan lawm thu sawiin hun a khar a ni.

Vawiin Fire Prevention Week hawnnaah hian sawrkar official-te, VC leh tlawmngai pawl ai awhte, chanchinbu mite leh Govt Kolasib College zirlaite an tel a ni.

Kumin Fire Prevention Week hian February ni 5 - 9, 2024 chhung a awh dawn a. Thupuiah, "Thapui thawhin kangmei chhuak tur i veng ang u" tih chu thlan a ni a. Week chhung hian Kolasib District chhungah kangmei venna lam inzirtirna (awareness campaign) uar zawka kalpui turin VC leh tlawmngai pawlte nen thawk hovin department lamin hma an la dawn a. Media kal tlanga thuchah tihchhuah, video clip siam, kohhran inkhawma thu puantir, vantlang tlangau hmanga inzirtirna puan leh zirlaite tana essay leh intihsiakna dang buatsaih te pawh tum a ni a. Kangmei ven kawnga thawk ṭha khuate chawimawina 'Village Level Fire Prevention Award 2024' pawh siam leh tum a ni.

Kolasib Forest Division hnuaia range 9-ah nikum chhung khan kangmei venna kawngah hma lakna hrang hrang kalpui a ni a. Kum 2021-2022 chhungin Kolasib District-ah ram hectare 112.50-a zau kangin, hectare 12.35 chu forest area a ni a; kum 2022-2023 chhungin hectare 102.26-a zau kangin, hectare 3 chu forest area a ni a; kum 2023-2024 chhungin hectare 87.02-a zau kangin, hectare 2.50 chu forest area a ni thung a; ram kang hi kum thum chhungin a tla hniam zawngin a kal a ni.

Fire Prevention Week hi Mizoramah kum 2000 aṭang khan hman ṭan niin, kumin hi a ṭum 25-na a ni a. Kum 2009 aṭang khan district leh village level fire prevention award sem ṭan niin, nikum 2023 khan Mizorama district hrang hrang zingah Kolasib District chuan kangmei ven kawnga district ti ṭha lawmman pathumna a dawng a ni.