3656/2023-2024

Mamit 5th February, 2024 : Vawiin khan Mamit District Level Fire Prevention Committee huaihawtin Chhimveng YMA Hall- ah Fire Prevention Week (5th-9th February, 2024) hawnna hun hman a ni a. Pi Lalthangpuii Pulamte, SP Mamit chuan khuallian niin a hmanpui.

Khuallian Pi Lalthangpuii Pulamte chuan khua a lo thal chho leh ta a, kan fimkhur tawk loh vangte, Lo/Leipui hal vangte, dan leh thupek zawm loh vangte in ram kan ti kang thin a, a pawi hle a ni tiin, ram kang hian nghawng thalo tak tak a nei thin a, mihring hriselna thlenga nghawng pawi thei a nih avangin, sawrkar pawhin ramkang ven hi a ngaipawimawhin State Level leh District Level ang pawhin committee dinin an ni hian ramkang venna atana theihtawp an chhuah thu a sawi a, Mamit District Level Fire Prevention Committee pawhin hmachhawp leh ruahmanna a neihte a hlawhtlinna tur leh dan leh thupek a zamte zawm theuh a, ramkang veng tura theihtawpchhuaha tha thawh theuh turin kalkhawm mipuite a sawm a. Ram kang mai bakah chhungkaw tinte pawhin kan in leh a velah kangmei chhuak thei laka kan him theihna tura ngaihtuahna seng theuh turin a chah bawk a ni.

Pu C. Lalrinmuana, Member Secretary DLCFP leh DFO Mamit ni bawk chuan ram kangin nghawng thalo a neih chi hrang hrang leh kangmei laka invenna turte a lem nen zirtirna a pe a. Pu K. Lalmuankima, Honorary Wildlife Warden Mamit kaihhruaina-in ram ti kang lo tura intiamna thutiam sawirualna neih a ni.

Kumin Fire Prevention Week thupui atan hian 'Thapui thawhin kangmei chhuak tur i veng ang u' tih chu hman a ni.

Fire Prevention Week hawnna hi Pu Vanlalchhuanga Chhangte, President Sub Hqrs YMA chuan kaihruaiin, Pu Rodingliana, Chairman Jt. V/C leh Pu David Zoramluahthanga, OC Fire & Emergency Services te'n thusawina an nei a, Pu C Rochhinga, DLAO Mamit-in lawmthusawina a nei bawk.

He hunah hian Sawrkar officials, Tlawmngaipawl hrang hrang aiawhte leh zirlai naupangte an tel a ni.