Vawiin hian Serchhip-ah kangmei laka fimkhur a tul zia inzirtirna Hapta, Fire Prevention Week hawnna neih a ni a, District Bawrhsap Pi Sangchhin Chinzah chu khuallian niin, he hapta hi a hawng a ni.

Sangchhin Chinzah, Chairman, District Fire Prevention Committee leh District Bawrhsap ni bawk chuan kum tin Mizorama ram kang a awm thin chu mipui ten a ram neitu kan nih anga kan ram kan enkawl loh vang leh a chhe zawnga kan nuna nghawng a neih dan kan hriat loh vang nia a hriat thu a sawi a. Kan ram zau zawng chu than belh tur anih loh thu sawiin, mipui erawh kan pun zel dawn avangin a neitu kan nih anga uluk taka kan enkawl a tul thu leh a chhunga chengte hi a tinuama a humhalhtu tur kan ni tih kan hriat thar a tul thu a sawi. Kan khawsak phung avanga loh theihloha Lo kan hal ala tul avangin kan vah bak ram a kan lohna tura kan fimkhur a tul thu pawh sawiin, ram kan tih kan hian thing leh mau a chhiat mai bakah a chhunga cheng nungcha zawng zawng nen a suat avangin nasa taka a chhe zawnga min nghawng thin thu a sawi a. Kan ngaw chereu avangin tuihna a kiam zel thu leh kan sik leh sa pawh a mumalloh phah zel thu sawiin, hetiang taka nghawng thalo a neih avang hian ram tikang an lo awm palh a nih pawhin a tikangtu kan hria a nih chuan thup mai lovin thuneitute hnena hriattir zel turin mipuite chu a chah a. Hetianga District chhung ami te zawng zawng kan tanrual chuan kangmei venna kawnga thawk tha ber kan nih theih thu a sawi bawk.

Pu C. Ramengmawia, President, MJA Serchhip District  chuan kangmei chhuak tam ber chu fimkhur tawk loh vang ani a ti a, Mizoram sawrkar in kumina lo leh huan hal tur neite tan March 15 hmaa hal tura ruahmanna a siam thu leh hei hi zawm theuh a tul dawn thu sawiin, lo leh huan hal tur neite chuan tha taka Meilam siala hal thin a tul thu a sawi a. Kangmei chhuak tha taka thelh aiin kangmei tichhuak lo tura fimkhur a tul thu a sawi bawk.

Lallianzuala, Member Secretary, District Fire Prevention Committee leh DFO Thenzawl chuan kumin a District Level Fire Prevention Committee-in he Hapta hman dan tura ruahmanna an siam te a sawi a. Kumina kangmei vengna thupui atan chuan ‘Ram ti kang lo turin i fimkhur ang u’ tih anih thu a sawiin, District Level-a hawnna hun Serchhip-a neih a nih bakah hian khaw hrang hrangah he Hapta hawnna hi VC te kaihhruaina hnuaiah neih tura ruahman a nih thu te, zirna In hrang hrangah leh Media hrang hrangah te inzirtirna neih a nih dawn thu sawiin, District chhunga khaw hrang hrang zinga kangmei venna kawnga hma la tha te thlangchhuakin lawmman hlan an nih leh dawn thu a sawi bawk.

Vawiin a Fire Prevention Week hawnna hun hi Pu R. Sanghmingthanga, President, Serchhip Sub-Hqrs. YMA  chuan kaihruaiin Serchhip-a sawrkar Department hrang hrang hotu te, YMA Branch hrang hrang hruaitute, khawtlang hruaitu VC leh thuthar thehdarhtute an tel a ni.