Vawiin khan Govt Mamit College Conference Hall-ah Fire Prevention Week 2018 hawnna neih a ni a. Pi Lalbiaksangi, District Bawrhsap chuan khuallian niin he hun hi a hawng.

Khuallian chuan thu sawiin tuihna tam tak kan neih theih nan leh kan tuihna neihsate pawh a riral mai loh nan thingphun uar deuh deuh turin kalkhawm mipuite a chah a, bawlhhlawh kan tihral danah pawh kan fimkhur a tul hle a, bawlhhlawh tawih thei lo te'n ram nasa taka a tihchereu theih avangin a hmun taka bawlhhlawh paih turin kalkhawmte a  chah. Mamit Districtict-ah bawlhhlawh sawngbawlna hmunpui bun tura hmalak tum mek a nih thu a sawi bawk. Aspirational District 115 thlanchhuah zingah Mamit District chu thlanchhuah anih ve avangin Mamit khawpui chu Atal Mission for Rejuvenation and Urban  Transformation (AMRUT) hnuaiah cheibawl tum mek a ni a. International Fund for Agricultural Development (IFAD) Expert Member te'n nikuma survey an lo neih tawh angin Mamit District chu kuthnathawktute chawikanna tur Project hrang hrang thawh theih turin thlanfel a nih tawh thu a sawi a ni. Mamit District chu ramngaw ngah ber District kan la ni a, heng ramngawte humhalh hna hi Sorkar tih turah chauh dah lova mipui mimirte'n ngaipawimawh a, kan theihna zawn theuhah ke pen ve turin kalkhawm mipuite a sawm a ni.

Pu Lalnunsanga Khawlhring, DFO Mamit & Member Secretary, District Level Fire Prevention Committee (DLFPC) chuan Report pein nikum khan Sawrkar hun bituk chhunga lo hal vek khaw 15 an awm a, huntiam chhunga hal ve thei lo chhungkaw 1343 awmin April Ni 15 thlenga lo hal thei lo khaw 8 an awm thu a tarlang a. Ruahtui a tlak hma avangin dan zawm lote chungah hremna pek an awm loh thu sawiin Mamit District chhungah Village Fire Prevention Committee khaw 28-ah din a ni a, District chhungah in kang a awm lova, kangmei avanga nunna chan an awm loh thu a sawi bakah kawngpui dung ram kang hlauhawm zualna hmunah Km 32 a thui meikawng sial a nih thu a sawi bawk. Kumin hian March Ni 15 aia tlai lovah Lo/huan hal vek tura ruahman niin Lengpui Airport chhehvel khuate chuan lo hal hi tlai lam dar 3:30 hnulamah thlawhna tum leh chhuak tibuai lo zawnga kalpui tura ruahman a ni. District leh Village Level Fire Prevention Awards siam leh tura ruahman a nih thu a tarlang a ni.

He hun hi Pu Zatluanga Sailo, President, Sub Hqrs YMA Mamitin kaihhruaiin Dr.C.Zothankhuma, CMO Mamit leh Pu K.Lalmuankima, Headmaster, Govt Middle School III te pawhin thusawina hun an nei a ni.