Road Safety Week-2018 chu vawiin chawhnu dar 2 khan I&PR Auditorium, CHANEM Building, Champhaiah hawn a ni a. Road Safety Week vawi 29-na hi Pi Lalsangpuii Hmar, Addl DC, Champhai District chuan khuallian niiin a hmanpui a ni.
Khuallian Pi Lalsangpuii Hmar chuan sawrkarin mipuite himna a ngaihpawhmawh em avangin Road Safety Week chu kum tin State leh National level thlenga a hman thin thu a sawi a. Lirthei chunga chetsualna avanga senso chu a tam thin hle a ni, a ti a. Chetsualna laka him tur chuan Driver mai nilovin passenger leh kawng kal mipuite pawh fimkhur a ngai vek a ni, a ti a. Lirthei khalh thiam chauh hi duh tawk mai tur a ni lova, dan leh dunte hriat tel angai a, fimkhur leh hawihhawmna nena lirthei khalh kan inzir thar leh hi a pawimawh hle a ni, a ti a. Traffice rules ngaihpawimawh chu tihmakmawh a nih thu a sawi a. Road Safety chungchanga zirtirnate chu ngaithla liam mai lova midangte zirtir chhhawngtu ni theuh turin a chah a. Road Safety chu hapta khat chauh hmang lova kumtluana hmang turin vawiina he ni puala kalkhawmte chu a sawm nghal bawk a ni.
He hunah hian Pu Lalbiakkila, Addl SP, Champhai pawhin thu sawina hun an nei a. Lirtheih khalhtute tana hriattur pawimawh hrang hrang leh dan leh dun awm angte hrilhhriatna hun a nei a. Lirthei chunga thihna hi a pung chak em em a, hemi kawngah hian mitinte abikin Lirthei khalhtute tan fimkhur thar leh a tul tak zet thu a sawi a ni.
Kum 2017 bika Champhai district chhunga Lirthei chunga chetsualna tum 6 a thlenga. Mi 7 thiin midang 6-in hliam an tuar a ni. Traffic dan zawm lo leh Lirthei pawisa chawi avanga sum tlingkhawm chu a vaiin Rs 48,05,98/- a ni. Kumin bikah chuan Road accident report a la awm lova, Traffic dan zawm lo leh Lirthei pawisa chawi avanga sum tlingkhawm Rs 22,600 hmuh a ni tawh bawk a ni.
Week hawnna inkhawm hi District Road Safety Committee Member Secretary, Pu Pachhunga, Champhai DTO ni bawk chuan kaihruaiin Week chhunga hmalak dan tur District Committee in a ruahman hrang hrangte a tarlang a.
Road Safety Week hawnna ah hian Champhaia Zoram Drivers Union hotute, Rickshaw, Taxi, Maxicab leh Truck Owners/Drivers Associations hruaitute, District Officers hote, chanchinbumite leh tlawmngai pawl aiawhte an tel a ni. Week pual hian Banner, Flag-te siam niin tarchhuah a ni.
