Vawiin chawhnu khan Convention Centre, Lunglei ah Fire Prevention Week 2018 hawnna hun hman a ni. Pu S.Laldingliana, Vice Chairman, High Powered Committee chu khuallian ni in he Week hi a hawng. Hawnna inkhawm ah hian Lunglei District officials, khawtlang hruaitute, MJA hotute, tlawmngai pawl aiawhte leh zirlai thahnem tak an kalkhawm.

Fire Prevention Week 2018 hawnna inkhawm Pu Benjamin Lalzama, Addi tional DC, Lunglei kaihhruaiah hian khuallian Pu S.Laldingliana chuan thu sawiin kangmei venna hapta kan hman hi kangmei chhuak tawh lo tura hma thar lakna nise a duh thu sawi a. Tun thlengin Mizoramah kangmei ala chhuak thin chu pawi a tih thu sawiin kangmei ven leh environment humhalhna kawngah sawrkarin nasa takin hma a la chhunzawm zel dawn a ni, a ti a. Mizoram kan ram neih chhun hi kan tu leh fa te tan a ram nuam leh chenna tlak a siam tur chuan ramngaw leh environment humhalh kawngah tan kan lak a ngai a ni tiin hemi kawng ah hian zirtirtu ni theuh turin kal khawm te a chah a. Ram kang hian thing leh mau, nungcha leh boruak thleng in nasa takin a nghawng a, hei hian kan tuihna a ti tlem a, buh leh bal tharchhuah na kawng ah nasa takin harsatna a thlen a ni, a ti. Nungchate hnen a chanchin tha kan hrilh theih dan chu an chenna ramngaw humhalh hi a ni a ti. Sawrkar in NGO’s te thawhpuina in ramngaw chereu mek te thar thawh nan thing tam tak a phun a, ram ngaw siam nan Forest department hi tanpui a, thawhpui i tum theuh ang u a ti bawk.

Dr.C.Vidhyasagar, IFS, Divisional Forest Officer leh Member Secretary, Lunglei District Fire Prevention Committee ni bawk chuan report pein India ram pum ngaihtuah in North East India ah hian kangmei hi a chhuak nasa bik a, Mizoram phei chu India ram ah kangmei chhuak nasa State panga thlan chhuah zing ah a tel a ni ti in, kum 2017 chhung khan Lunglei District chhung ah kangmei chhuak vawi 234 report a ni a, heng zing ah hian lo hal vangin vawi 226 kangmei a chhuak a ni, a ti. Kangmei chhuak tur ven na kawng ah hian department chuan hma la in, mei kawng te sial in control burning tepawh an nei bawk thin a ni. Hmun hrang hrang ah kangmei chhuak awm leh awm loh vil nan Watch tower te siam a ni. Heng bak ah hian kangmei ven pawimawhna chungchang a tam thei ang ber a awareness campaign neih thin a ni. Kangmei ven kawng ah VC leh NGO’s hrang hrang te bak ah District Level Fire Prevention Committee ten awareness leh kawng hrang hrang in hma an la a ni a ti. Mizoram hi India ram chhung a state hrang hrang zing ah Fire Mascot nei hmasaber a ni a, mascot chu Khitea tih a ni a ti.

Fire Prevention Week 2018 hi 12th February 2018 atanga 18th February chhung ni n Thupui atan “Ram ti kang lo turin mitin i fimkhur ang u” tih a ni.

Attachment

  • Loading attachment...